Ellefu íslenskar konur, sem allar glíma við parkinson sjúkdóminn ganga inn með íslenska landsliðinu þegar liðið mætir Þýskalandi á Laugardalsvell nú á eftir. Þetta er hluti af samstarfsverkefni KSÍ og Parkinsonsamtakana.

Ísland mælist í 2. sæti yfir hæstu dánartíðni vegna parkinson á eftir Finnlandi samkvæmt Alþjóðlegu heilbrigðisstofnuninni

„Við viljum helst vekja athygli á aukningu fólks með parkinson hér á landi, aðallega vegna lengri lífaldurs, en flestir greinast eftir sextugt. Það vantar aðstöðu fyrir fólkið og því söfnum við fyrir parkinsonsetri. Í Parkinsonsetrinu er ætlunin að bjóða upp á fræðslu, þjálfun, ráðgjöf og dagvist með sérhæfðri endurhæfingu. Eins og staðan er í dag þá er þessi þjónusta ekki í boði fyrir fólk með Parkinson á Íslandi og það gengur ekki upp,” segir Vilborg Jónsdóttir, formaður Parkinsonsamtakanna.

Konurnar sem leiða landsliðskonurnar inn á völlinn eru:

Malin Brand 37 ára
Greindist fyrir rúmu einu og hálfu ári. Malin vinnur sem blaðamaður, þýðandi og sjálfstætt starfandi ljósmyndari. Hún er í hlutastarfi hjá ABC barnahjálp og stundar nám í þýðingafræði við Háskóla Íslands.

Hanna Vilhjálmsdóttir 44 ára
Greindist í ágúst 2015 þá 41 árs. Hanna er menntaður kennari, en fór í bókhaldsnám eftir greiningu og skipti um starf. Sér nú um bókhald fyrir eitt fyrirtæki.

Salóme Halldóra Gunnarsdóttir 49 ára
Greindist í janúar 2017. Starfar sem hjúkrunarfræðingur í hálfu starfi á Landspítala. Salóme er gift og á þrjú börn.

Kristín Þ. Guðmundsdóttir 58 ára
Greindist 15. desember 2017. Kristín er fyrrverandi deildarstjóri á leikskóla, útivistarkona og lestrarhestur.

Vilborg Jónsdóttir 56 ára (F)
Greindist árið 2015. Vilborg er formaður í parkinsonsamtökunum og starfar í eigin fyrirtæki.

Anna Björg Siggeirsdóttir 57 ára
Greindist árið 2006. Anna vann við útgáfu og kynningarmál hjá VR en er núna í masternámi í ritlist í Háskóla Íslands.

Ólöf Ólafsdóttir 62 ára
Greindist fyrir þremur árum. Ólöf er bóndi í hálfu starfi. Hún saumar bútasaumsteppi / velferðarteppi til að þjálfa hendurnar. Allur ágóði af sölu teppanna rennur til velferðarmála.

Guðrún Hafdís Óðinsdóttir 63 ára
Greindist árið 2012. Hún aðstoðaskólastjóri í 50 % starfi, núna í veikindaleyfi og telur ólíklegt að hún snúi aftur til vinnu.

Jóhanna V Magnúsdóttir 65 ára
Greindist um mitt ár 2015. Jóhanna vann áður við skrifstofustörf.

Ingibjörg Hjartardóttir 67 ára
Greindist fyrir 4 árum. Ingibjörg er rithöfundur og starfar sjálfstætt. Hún stundar nám í þýðingafræði við Háskóla Íslands.

Hrafnhildur Björk Sigurðardóttir 76 ára
Greindist í febrúar 2003. Starfaði áður sem útibússtjóri hjá Landsbanka Íslands.