Ekki er óalgengt að finna árþúsundagamla steingervinga í jörðu niðri í Jakútsk héraði í austurhluta Rússlands. Vísindamenn gerðu merka uppgötvun fyrr í mánuðinum þegar þeir grófu upp folald úr freðmýrinni í héraðinu. Fundurinn þykir einstakur þar sem dýrið þykir mjög vel varðveitt og hefur líklega verið varðveitt í 30 til 40 þúsund ár.

„Þetta er einstakt þar sem það hefur varðveist án nokkurra sjáanlegra áverka,“ segir Semyon Grigoryev forstöðumaður Mammútasafnsins í Jakútsk. „Líffæri dýrsins eru ekki einungis heilleg heldur feldurinn líka sem er afar sjaldgæft hjá svo fornum skepnum.“

Steingervingar víða í Jakútsk
Líkt og áður segir eru steingervingafundir algengir í Jakútsk. Jarðneskar leyfar fjölda loðfíla hafa fundist á svæðinu en íbúar finna sér ýmis not fyrir afurðir þeirra fornu skepna sem koma reglulega úr jörðu í Jakútsk. Jakútskbúinn Vladimir Ammosov hefur sankað að sér Loðfílahári héðan og þaðan og hefur nú fengið aðstoð við að prjóna húfu að hefðbundnum jakútskum stíl en þær eru gjarnan úr hrossahárum.

„Ég hafði upp á gamalli konu sem býr til hatta úr hrossahári og fékk hana til verksins,“ segir Ammosov „Hún prjónaði húfuna en kvartaði yfir því hve stutt hárin voru.“

Talið er að mammútar urðu útdauðir fyrir um tíu þúsund árum síðan sem þýðir að húfa Ammosov gæti verið sú elsta sem vitað er um eða í það minnsta úr elstu ullinni. Nágrannar og vinir Ammosov sýndu gripnum lítinn áhuga en eftir að hann byrjaði að birta myndir af húfunni á samfélagsmiðlum vonast hann til að geta selt hana á tíu þúsund Bandaríkjadali, eða eina milljón íslenskra króna.

„Þetta fór allt á flug eftir að ég setti myndir af henni á Instagram og WhatsApp,“ segir hann, „Fyrir það sagði ég vinum mínum frá þessu en enginn þeirra var spenntur fyrir húfunni.“