Erlent

Alexis Tsipras lofar því að rífa ólöglegar byggingar

Þórgnýr Einar Albertsson skrifar
Alexis Tsipras.
Alexis Tsipras. Vísir/Getty
Alexis Tsipras, forsætisráðherra Grikklands, sagði í gær að rúmlega 3.200 ólöglegar byggingar á Attíkuskaga yrðu rifnar niður hið snarasta. Byggingarnar hafa verið mikið í umræðunni á Grikklandi frá því skógareldar á svæðinu kostuðu 91 lífið í júlí og hefur ríkisstjórnin sagt að byggingarnar hafi torveldað flótta fólks af svæðinu.

„Hver sú bygging sem stofnar lífi fólks í hættu verður rifin. Það er skylda okkar við þá látnu, og enn fremur við þá sem enn lifa,“ sagði forsætisráðherrann í gær.

Byggingarnar sem um ræðir eru margar áratugagamlar. Samkvæmt BBC eru þær jafnan byggðar í leyfisleysi. Mörgum árum eftir byggingu öðlast þær þó friðhelgi eftir samkomulagi við ríkið.

Gríska ríkisstjórnin hefur verið gagnrýnd fyrir að bregðast seint og illa við hamförunum. Tsipras brást að hluta við þeirri gagnrýni er hann sagði í yfirlýsingu á sunnudag að yfirmenn lögreglu og slökkviliðs á svæðinu hefðu verið reknir. Á föstudag sagði svo ráðherra almannavarna af sér.




Tengdar fréttir

Í mál við yfirvöld vegna eldanna

Yfirvöld, slökkvilið, almannavarnir og lögregla sökuð um alvarlega vanrækslu og manndráp af gáleysi. Skógar­eldarnir á Attíkuskaga kostuðu að minnsta kosti 92 lífið. Lögregla beindi ökumönnum í veg fyrir eldinn.




Fleiri fréttir

Sjá meira


×