HM í dag: Tómar fær aldrei nóg af uppáhaldinu hennar Klöru

Það skall engin haka í gólfið þegar dagur rann í Kabardinka í Rússlandi og veðrið bauð upp á 25 stig, sól og hafgolu. Enn er talið niður í leikinn stóra gegn Argentínu á laugardaginn og frábærum sigri stelpnanna okkar á Slóveníu í gærkvöldi fagnað.

Í dag heilsar HM í dag frá æfingavelli strákanna þar sem vallarstarfsmenn voru í alls konar basli með girðingarnar, þær sömu og fuku í fyrrinótt. Þeir leystu þó úr vandamálinu án aðkomu íþróttafréttamanns með meistaragráðu í byggingaverkfræði.

Tómas Þór heitir Tómar Þór í Rússlandi sem hjálpar sparkspekingnum ekki að gleyma erfiðum tíma úr Víkinni árið 2001 þegar hann var skólaður af fimm ára iðkanda. Hann tekur hins vegar gleði sína á ný með armenska apríkósu í hönd, uppáhald Klöru Bjartmarz, framkvæmdastjóra KSÍ.

Flókið að skilja? Þetta skýrir sig sjálft í þriðja þætti HM í dag sem sjá má í spilaranum hér að neðan.