„Ég byrjaði að spila hér úti í Slóvakíu árið 2015, en ég hef alltaf haft mikinn áhuga fyrir tónlist síðan ég var ungur. Ég æfði á píanó í 10 ár og kláraði burtfarapróf frá Tónlistarskóla Kópavogs þegar ég var tvítugur og fór svo að vinna í minni eigin tónlist eftir það,“ segir Victor Guðmundsson sem er í læknisfræði í Martin í Slóvakíu.

Hann er að klára fjórða árið og mun útskrifast 2020. Victor er aftur á móti að gera það gott sem plötusnúður í Slóvakíu og kallar sig Doctor Victor.

„Þetta hefur þróast mjög hratt síðan ég byrjaði fyrir rúmum þremur árum, en eftir mitt fyrsta gigg hér í Slóvakíu fór ég að spila reglulega og svo byrjaði boltinn að rúlla. Út frá því hef ég fengið ýmis gigg meðal annars í Ísrael, Noregi og Ungverjalandi.“

Victor segist koma fram sirka á mánaðar fresti.

„Það fer svolítið eftir því hversu mikið er að gera í skólanum. Ég hef þó minnkað það aðeins undanfarið til þess að fókusa meira á mína eigin tónlist, en ég er að fara að gefa út ný lög fljótlega.“

Hingað til hefur það gengið vel að sameina læknisfræðina og tónlistina.

„En ég er duglegur að nýta frítímann í að sinna tónlistinni. Þetta er í rauninni bara spurning um að finna það sem maður hefur áhuga á, setja sér markmið og vinna í því alla daga - sem í mínu tilfelli er læknisfræðin og tónlistin.“

Victor segist ætla halda áfram sínu striki, klára námið og vinna áfram í tónlistinni.

„En ég er að rokka gömlu góðu David Guetta greiðsluna þannig að það er aldrei að vita hvar þetta endar,“ segir Victor léttur en hann kom fram á Íslandi í fyrsta sinn í fyrra.

„Þá spilaði ég á Þjóðhátíð með strákunum hjá RVK Events. Það var gríðarlega skemmtilegt en ég hef farið nánast árlega á Þjóðhátíð síðan ég var í menntaskóla. Annars er ég mjög ánægður með íslensku tónlistarsenuna og það eru flottir hlutir í gangi, þannig að ég er mjög spenntur fyrir komandi tímum og opinn fyrir því að spila meira heima.“

Hér að neðan má kynna sér Doctor Victor á samfélagsmiðlum:
www.facebook.com/doctorvictorsound/
www.instagram.com/doctorvictorsound/

Hér að neðan má sjá myndband þegar Victor kom fram á einum stærsta skemmtistaðnum í Slóvakíu en hann heitir Ministry Of Fun.