Viðskiptabann kyrrsetur einkaflugvél Íransforseta

Bandaríkjastjórn hefur sett viðskiptabann á íranskt fyrirtæki sem hefur það eina hlutverk að sjá um rekstur einkaflugvélar íranska forsetans. Formaður hagsmunasamtaka íransk-ættaðra Bandaríkjamanna segir þetta vísvitandi gert til að niðurlægja og veikja forsetann sem er umbótasinni. Það muni styrkja harðlínuklerka í sessi og grafa undan kjörnum leiðtogum og umbótasinnum í Íran almennt.

Vegna þessarar ákvörðunar er líklegt að Hassan Rouhani, forseti Írans, eigi í erfiðleikum með að nota einkaþotu sína sem er nítján ára gömul Airbus þota af gerðinni A340-300. Fyrirtæki sem sjá um rekstur flugvalla víða um heim gætu lent í vandræðum ef þau þjónusta þotuna með einhverjum hætti, t.d. með því að fylla hana af eldsneyti.