Enn á gjörgæslu eftir eldsvoða í Grafarvogi

Einn er enn á gjörgæslu á Landspítala Íslands eftir í eldsvoða í Grafarvogi í nótt. Alls voru tólf fluttir á Landspítalann eftir að eldur kviknaði í einbýlishúsi í Mosfellsbæ og í íbúð á fjórðu hæð í fjölbýlishúsi í Grafarvogi.

Stefán Hrafn Hagalín, upplýsingafulltrúi Landspítalans, segir í samtali við Vísi að stóri hluti þeirra sem var fluttur á Landspítalann vegna eldsvoðanna tveggja í nótt hafi verið útskrifaður.

Íbúinn sem býr í íbúðinni þar sem eldurinn kom upp í Bláhömrum í Grafarvogi var fluttur í lífshættu á Landspítalann og er enn á gjörgæslu.

Eldsins varð vart um klukkan hálf þrjú og logaði mikill eldur í íbúðinni, þegar slökkvilið kom á vettvang.

Reykkafarar fundu húsráðandann meðvitundarlausan og var hann fluttur i skyndingu á sjúkrahús. Sex aðrir íbúar hússins voru fluttir á slysadeild til rannsókna vegna gruns um reykeitrun, en engan þeirra mun hafa sakað alvarlega.

Tuttugu mínútum eftir að útkallið barst í Grafarvogi var tilkynnt um alelda einbýlishús í Mosfellsbæ. Þar hafði fimm manna fjölskylda sloppið naumlega út í gegn um glugga á síðustu stundu og var fólkið flutt á slysadeild Landspítalans til aðhlynningar. Þar mun enginn þó hafa meiðst alvarlega og er talið að reykskynjari hafi bjargað því að ekki fór verr. Húsið er hins vegar brunnið til grunna.