Fannst hreyfingarlaus við skemmtistað í miðbænum

Lögreglunni á höfuðborgarsvæðinu barst á þriðja tímanum í nótt tilkynning um konu sem lamdi karlmann með flösku í hausinn í heimahúsi í Breiðholti. Málið er í rannsókn, að því er fram kemur í dagbók lögreglunnar á höfuðborgarsvæðinu.

Um klukkan hálf fimm í morgun var tilkynnt um hreyfingarlausan mann við skemmtistað í miðbænum en hann reyndist hafa dottið á höfuðið. Hann var fluttur á slysadeild með sjúkrabifreið vegna áverka á höfði.

Þá stöðvaði lögregla þrjá ökumenn en þeir reyndust ýmist án ökuréttinda eða aka undir áhrifum fíkniefna. Að öðru leyti var nóttin róleg, að sögn lögreglu, og gistu fáir fangageymslur.