Spá allt að tíu stiga frosti

Búast má við allt að tíu stiga frosti í innsveitum norðaustan lands í nótt að því er fram kemur í hugleiðingum veðurfræðings á vef Veðurstofu Íslands. Heiðskírt verður á þessum hluta landsins og mun því frysta, og frostið gæti náð tveggja stafa tölu.

Í hugleiðingum veðurfræðings segir jafnframt að í dag verði hæg austlæg átt, víða skýjað og dálítil væta af og til en á Norður- og Austurlandi verður yfirleitt þurrt og bjart.

Hann mun síðan snúast í norðan 8 til 13 norðvestan til á landnu sem og á Snæfellsnesi og Reykjanesi með rigningu í kvöld en vindur verður hægari annars staðar á landinu og minni úrkoma. Hiti verður víða 1 til 6 stig.

Á morgun er svo áfram spáð hægri austlægri átt, léttskýjuðu veðri og þá mun kólna. Frost 2 til 10 stig annaðkvöld, kaldast í innsveitum norðanlands, og frostlaust með suðurströndinni.

Veðurhorfur á landinu:

Austlæg átt 3-8 m/s og léttskýjað á Norður- og Austurlandi, en skýjað með köflum og sums staðar smáskúrir sunnan- og vestanlands. Norðlæg átt 8-13 og dálítil rigning um landið norðvestanvert í kvöld, annars hægari. Hiti 0 til 6 stig en frost 0 til 6 stig norðaustantil. Hæg austlæg eða breytileg átt morgun og léttskýjað, en stöku skúrir suðaustanlands. Kólnar heldur.

Á fimmtudag:

Hæg norðaustlæg eða breytileg átt og skýjað með köflum. Yfirleitt þurrt um sunnanvert landið og hiti allt að 6 stigum syðst, en frost 0 til 5 stig norðantil á landinu.

Á föstudag, laugardag og sunnudag:

Hæg breytileg átt og léttskýjað. Frost 3 til 8 stig í innsveitum fyrir norðan, annars í kringum frostmark og allt að 6 stiga hiti með suður- og vesturströndinni.

Á mánudag:

Gengur í strekkings suðaustanátt með rigningu sunnan- og vestantil á landinu. Hiti 0 til 6 stig. Hægari vindur, þurrt og bjart norðaustanlands og frost 0 til 6 stig.