Versta byrjun Íslandsmeistara á öldinni

Íslands- og bikarmeistarar ÍBV töpuðu í gær fimmta deildarleik sínum á tímabilinu þegar þeir lágu á heimavelli á móti nýliðum KA í 9. umferð Olís deildar karla í handbolta.

ÍBV liðið hefur nú tapað þremur deildarleikjum í röð og þremur af fimm heimaleikjum sínum í vetur. Fyrir vikið er liðið nú aðeins einu stigi frá fallsæti og liðið fyrir neðan (Fram) á leik inni.

Allt þetta gerir þetta líka að verkum að þetta Eyjalið er nú það Íslandsmeistaralið á öldinni sem hefur byrjað titlvörn sína verst.

ÍBV hefur aðeins náð í 6 stig af 18 mögulegum eða 33 prósent stiga í boði.

Tvö lið áttu heiðurinn af verstu byrjun Íslandsmeistara á öldinni fyrir þetta tímabil en lið Hauka 2016 og lið HK 2012 náðu bæði í aðeins átta stig í fyrstu níu leikjum sínum.

Eyjaliðið hefur aðeins unnið einn af fimm heimaleikjum sínum sem er kannski skrýtnasta við þennan slaka árangur Eyjaliðsins enda ÍBV-liðið alltaf erfitt heim að sækja.

Leikurinn á móti KA var þriðji tapleikur Eyjamanna í röð en þeir höfðu áður tapað fyrir Val (28-30) og FH (27-28). Það fylgir þó sögunni að þessum þremur leikjum tapaði Eyjaliðið þó aðeins með fimm mörkum samanlagt. Það hefur því ekki munað miklu í þessum þremur spennandi leikjum.

Hér fyrir neðan má sjá hvaða Íslandsmeistarar hafa byrjað titilvörn sína verst á þessari öld.

Versta byrjun Íslandsmeistara í fyrstu níu leikjum titilvarnarinnar:

ÍBV 2018 - 6 stig (2 sigurleikir, 5 tapleikir)

Haukar 2016 - 8 stig (4 sigurleikir, 5 tapleikir)

HK 2012 - 8 stig (3 sigurleikir, 4 tapleikir)  

ÍBV 2014 - 9 stig (4 sigurleikir, 4 tapleikir)

Fram 2013 - 10 stig (5 sigurleikir, 4 tapleikir)

Haukar 2010 - 10 stig (5 sigurleikir, 4 tapleikir)

Haukar 2008 - 10 stig (5 sigurleikir, 4 tapleikir)

Valur 2007 - 10 stig (4 sigurleikir, 3 tapleikir)

Fæst stig liða í síðustu fimm leikjum sínum í Olís deild karla:

Akureyri 1

Fram 2

ÍBV 3

Grótta 3

KA 4

Valur 5

ÍR 6

FH 6

Afturelding 6

Selfoss 7

Stjarnan 8

Haukar 9

Lengstu lifandi taphrinur í Olís deild karla í dag:

3 tapleikir í röð

ÍBV

Fram

2 tapleikir í röð

Grótta

Akureyri