Fimm Íranar í viðskiptabann vegna eldflaugaútflutnings

Bandaríkjastjórn hefur sett fimm íranska ríkisborgara í viðskiptabann vegna tengsla við útflutning á eldflaugatækni. Þeir tilheyra allir írönsku byltingarvörðunum, sem eru hersveitir sem heyra beint undir æðsta klerk og leiðtoga landsins, Ayatollah Khamenei.

Mennirnir eru sagðir hafa átt þátt í að útvega uppreisnarmönnum í Jemen eldflaugar. Þær hafi verið notaðar til að ógna olíulindum í Sádí Arabíu.



Sjálfir hafa Sádar gert þúsundir loftárása á uppreisnarmenn í Jemen síðustu misseri. Árásir Sáda hafa kostað meira en tíu þúsund mannslíf, þar á meðal er fjöldi almennra borgara. Þá hafa meira en hundrað þúsund börn dáið úr fyrirbyggjanlegum sjúkdómum vegna átakanna, að sögn mannréttindasamtaka.