Framlengja lokun á Skógaheiði

Umhverfisstofnun segir ekki raunhæft að að opna Skógaheiði strax vegna aurbleytu og viðkvæms ástands gróðurs. Stofnunin auglýsti lokun á leiðinni þann 23.mars síðastliðin en hefur nú framlengt lokunina um sjö vikur. Nú þegar að frost er að fara úr jörðu myndast mikil leðja í gönguslóðanum, hann verður mjög háll og hætta á að fólk renni til og gangi því með fram slóðanum. Svæðið verður opnað aftur um leið og aðstæður leyfa eða eigi síðar en 2.júní næstkomandi.

Umferð ferðamanna er mjög mikil á Skógaheiði en gönguleiðin þolir ekki þá umferð á svo viðkvæmum tíma þegar frost er að fara úr jörðu og gróður að vakna úr dvala. Svæðið er hluti af gönguleiðinni um Fimmvörðuháls en vinna við lagfæringu á umræddri gönguleið hófst veturinn 2017.

Umhverfisstofnun biður ferðaþjónustuaðila að miðla þessum upplýsingum og brýna mikilvægi þess að virða lokanir á náttúruverndarsvæðum.