Golf

Garcia bauð upp á köku frá eiginkonunni í eftirsóttasta matarboði íþróttaheimsins

Henry Birgir Gunnarsson skrifar
Aðeins fyrir útvalda. Hér má sjá hópinn glæsilega sem snæddi saman í gær.
Aðeins fyrir útvalda. Hér má sjá hópinn glæsilega sem snæddi saman í gær. twitter/themasters
Það er haldið fast í hefðirnar á Masters-mótinu í golfi og í gær var komið að Spánverjanum Sergio Garcia að bjóða til veislu.

Sigurvegari hvers árs fær nefnilega að ráða matseðlinum í eftirsóttasta matarboði íþróttaheimsins. Í það matarboð fá aðeins að mæta fyrrum meistarar á Masters og þeir mæta að sjálfsögðu í grænu jökkunum sínum.

Garcia var með alþjóðlegt salat í forrétt í gær. Í salatinu var eitthvað frá öllum þjóðlöndum þeirra sem hafa unnið mótið skemmtilega.





Í aðalrétt var spænskur réttur þar sem uppistaðan er hrísgrjón og humar. Eftirréttabomban var svo kaka sem eiginkona Garcia, Angela, bakar reglulega fyrir hann. Garcia vildi endilega að allir hinir grænstakkarnir fengju að prófa hana. Að sjálfsögðu var svo spænskt vín á borðum.

Garcia hefur beðið allt sitt líf eftir því að fá að halda þetta matarboð og hann naut sín því eðlilega vel í góðra manna hópi.





Þessi hefð byrjaði árið 1952 en hugmyndin kom frá Ben Hogan. Hefur verið boðið upp á mjög fjölbreyttan mat alla tíð síðan.

Það var Þjóðverjinn Bernhard Langer sem braut matarboðið upp árið 1986 með því að hafa matseðilinn persónulegan. Var þá með vínarsnitsel og Svartaskógsköku. Skotinn Sandy Lyle var líklega ekki mjög vinsæll er hann ákvað að mæta í Skotapilsi og bjóða upp á haggis árið 1989.

Er Tiger Woods varð yngsti meistarinn á Masters árið 1998 bauð hann upp á hamborgara, franskar og mjólkurhristing. „Svona er að vera ungur. Þetta er það sem við krakkarnir borðum,“ sagði Tiger léttur. Hann átti síðar eftir að bjóða upp á fajitas.

Mótið hefst í beinni á Golfstöðinni á morgun en í kvöld verður sýnt beint frá par 3 keppninni. Útsending hefst klukkan 19.00.

Golf

Tengdar fréttir

Fornir fjendur æfa saman í dag

Gömlu keppinautarnir Tiger Woods og Phil Mickelson munu væntanlega æfa saman á Augusta í dag en aðeins eru tveir dagar í að Masters-mótið hefjist þar.

Tiger: Bilun að ég sé að spila á Masters

Tiger Woods segir að það sé einfaldlega bilun að hann sé að spila á Masters í ár og hvað þá að hann sé með sigurstranglegri mönnum. Fyrir ári síðan gat hann varla setið í matarboði meistaranna.

Mest lesið


Fleiri fréttir

Sjá meira


×

Mest lesið