Báðir Evrópuleikir FH í Portúgal

FH mun leika báða leiki sína við Benfica í EHF bikarnum í Portúgal. Leikirnir fara fram helgina 13.- 14. október.

Mbl.is greinir frá þessu í dag. Þar segir að FH hafi ákveðið að selja heimaleikjarétt sinn til þess að draga úr kostnaði við þátttöku í leikjunum. Upphaflega átti seinni leikur liðanna að fara fram í Kaplakrika.

Leikirnir eru liður í annarri umferð EHF bikarsins. FH vann króatíska liðið Dubrava í fyrstu umferðinni.

Selfoss og ÍBV taka bæði þátt í annarri umferð bikarsins líkt og FH. Leikir þeirra fara þó fram heima og að heiman. Selfoss mætir Rivnica frá Slóveníu og ÍBV leikur við Aix frá Frakklandi.