Lögregluna á Austurlandi grunar að tveimur konum hafi verið byrlað ólyfjan á tónlistarhátíðinni Eistnaflugi, sem fram fór á Neskaupstað fyrr í sumar. Í dagbókarfærslu lögreglunnar, sem vísað er til á vef Austurfréttar, segir að konurnar hafi báðar leitað sér aðstoðar á sjúkrahúsinu í Neskaupstað þar sem önnur þeirra var lögð inn.
Konurnar hafi báðar borið fyrir sig minnis- og máttleysi. Þar að auki hafi önnur þeirra verið með lágan blóðþrýsting og blóðsprungin augu.
Haft er eftir yfirlögregluþjóni á Austurlandi að mál sem þessu séu alvarleg - en að um leið séu þau erfið í rannsókn. Ekki bætir úr skák að rannsóknirnar eru dýrar, ásamt því að helmingunartími lyfjanna er skammur.
Eftir að fregnir bárust af hugsanlegri byrlun var ákveðið að auka sýnileika gæslunnar á hátíðinni. Auk byrlunarmálanna tveggja komu upp fimm minniháttar fíkniefnamál á Eistnaflugi ásamt því að ein líkamsárás var kærð.
Tveimur kann að hafa verið byrlað
