Olíufélögin njóta góðs af vexti í einkaneyslu og ferðaþjónustu

Sérfræðingar Capacent meta gengi hlutabréfa í olíufélögunum N1 og Skeljungi umtalsvert hærra en markaðsgengi félaganna. Er þá tekið tillit til vænts ábata af sameiningu N1 og smásölufélagsins Festa. Að mati sérfræðinganna hefur mikill vöxtur í einkaneyslu og ferðaþjónustu sem og fólksfjölgun rennt styrkari stoðum undir hérlenda smásölu þótt samkeppni hafi sjaldan verið meiri eftir innkomu bandaríska verslunarrisans Costco á markaðinn.

Tekið skal fram að verðmötin voru gerð skömmu fyrir jól.

Verðmat Capacent á N1 með Festi innanborðs hljóðar upp á 32,3 milljarða króna, eða 129 krónur á hlut, sem er ríflega 13 prósent yfir markaðsvirði félagsins eftir lokun markaða í gær. Án Festa meta sérfræðingar Capacent hins vegar gengi hlutabréfa í N1 á 111 krónur á hlut, en til samanburðar var gengi bréfanna 114 krónur í gær. Telja þeir að fyrirhuguð kaup N1 á Festi muni breyta olíufélaginu mikið. Samlegð kaupanna liggi í innkaupum, bættri nýtingu á staðsetningu verslana og bensínstöðva og í stjórnunarkostnaði.

Stjórnendur N1 gera ráð fyrir 500 til 600 milljóna króna samlegðaráhrifum vegna kaupanna, sem er um fjögur prósent af rekstrarkostnaði sameinaðs félags, en greinendur Capacent telja þær væntingar fremur hófstillar.

Verðmat greinenda Capacent á Skeljungi hljóðar upp á 16,1 milljarð króna eða 7,6 krónur á hlut. Það er um 19 prósentum hærra en gengi hlutabréfa félagsins í gær sem var 6,4 krónur. Að mati Capacent munu þær hagræðingaraðgerðir sem stjórnendur olíufélagsins gripu til í lok október, auk minni bindingar í veltufjármunum, væntanlega draga stórlega úr neikvæðum áhrifum af uppsögn sölusamnings við flugfélögin Icelandair og WOW air.

Er auk þess bent á að þótt sala félagsins á eldsneyti hafi aukist mikið á fyrstu níu mánuðum síðasta árs hafi framlegð og rekstrarhagnaður lítið breyst enda sé samkeppnin hörð og vöxturinn hafi verið hvað mestur þar sem framlegð er lægst.

Fréttin birtist fyrst í Fréttablaðinu.