Rifist um rautt spjald í Seinni bylgjunni: Má ekki sparka í hausinn á mönnum

Marius Aleksejev, markmaður Akureyrar handboltafélags, fékk beint rautt spjald í viðureign Hauka og Akureyrar í Olísdeild karla um helgina. Sérfræðingar Seinni bylgjunnar voru ekki sammála um hvort þetta væri rautt spjald.

Aleksejev fékk spjaldið fyrir að hafa viljandi reynt að sparka í Brynjólf Snæ Brynjólfsson.

„Auðvitað. Sáu þið það ekki?“ spurði Logi Geirsson, einn sérfræðinga þáttarins, og var alveg á sama máli og dómarar leiksins.

„Boltinn er löngu farinn framhjá honum hinu meginn. Þetta er algjör steypa.“

Jóhann Gunnar Einarsson var þó ekki sammála kollega sínum í þessu máli.

„Þetta er ekki neitt. Ég heyrði einhvers staðar að markmaðurinn væri heilagur í teignum.“

„Þeir mega samt ekki sparka í hausinn á mönnum,“ skaut þáttastjórnandinn Tómas Þór Þórðarson þá inn í.

„Í markmannshreyfingu þá getur hann alltaf réttlætt að þetta sé bara markmannshreyfing,“ svaraði Jóhann Gunnar. „Þú átt ekki að stökkva inn í markið.“

„Þú ert bara í ruglinu,“ sagði Logi og lauk umræðunni.

Deilur sérfræðinganna og brotið má sjá í klippunni hér að neðan.