Fiskeldisspekúlantar ekki búnir að kaupa Bubba Morthens

Bubbi Morthens tónlistarmaður segir ekkert ankannalegt við það þó hann spili á hátíð sem Arnarlax styrki. Hann segir það reyndar fáránlegt bull. Það þó hann sé yfirlýstur andstæðingur sjókvíaeldis, en fyrirtækið Arnarlax er umfangsmikið á því sviði.

„Ég er að fara að spila fyrir fólkið í Bíldudal. Arnarlax er að sponsorera Bíldudals grænar baunir. Bæjarhátíðina sem hefur verið haldin árum saman. Skárra væri það nú ef menn geta ekki tekið tónlistinni minni fagnandi þó þeir séu ekki sammála skoðunum mínum,“ segir Bubbi.

Bubbi okkar Morthens

Hann var að gera sig kláran í að aka vestur til Bolungarvíkur þegar blaðamaður Vísis ræddi við hann, en þar vestra fer fram í dag mikil bæjarhátíð. Í auglýsingu frá Arnarlaxi kemur fram að fyrirtækið ætli að „starta Bíldudals grænum með Bubba og Arnarlax!“ Boðið verður uppá grillaðan lax við Skrímslasetrið og klukkan 17:30 mun „Bubbi okkar Morthens stíga á stokk og taka öll sín bestu lög.“

Bubba og Arnarlax? Bubbi okkar Mortens? Mörgum laxveiðimanninum er brugðið. Er Bubbi að svíkja málstaðinn?

En, Bubbi segir þetta alveg fáránlegt og segir af og frá að Arnarlax sé að kaupa ímynd sína. Og af og frá að hann hafi látið kaupa sig og skoðanir sínar. Sem hafa í þessu ekkert breyst. Þarna sé væntanlega verið að vitna til þess að þar fari tónlistarmaðurinn Bubbi og hann er allra. Bubbi spyr blaðamann hvers vegna þetta geti ekki farið saman? Og blaðamaður Vísis reynir ekki að svara því.

Afstaða Bubba ekkert breyst

„Arnarlax er að sponsorera bæjarhátíð. Þetta er svipað og að ég gæti ekki spilað á Akureyri á einhverjum tímum ef Samherji væri að leggja pening í einhverja hátíð, eða Vestmannaeyjum því þar væri eitthvað fyrirtæki sem gerir út á kvóta... þetta er óendanlegt bull,“ segir Bubbi og heldur áfram að rekja dæmi: Mega umhverfisverndarsinnar ekki fljúga af því að flugvélar menga?

„Þó Arnarlax sé að leggja pening í bæjarhátíð? Hvað annað ættu þessir karlar að gera nema leggja pening í bæjarfélagið til að halda sínum standard og sínu gúddvilli? Ég er að spila þar. Bara af því að ég er mótfallinn sjókvíaeldi á þá að fara að gera þetta eitthvað ankannalegt? Nei. Afstaða mín mun ekkert breytast. Ég lít á þetta sem algjört bull og ég hlakka mikið til að spila fyrir heimamenn og Ísfirðinga á morgun,“ segir Bubbi brattur sem aldrei fyrr. Segist njóta þess mjög að vera „on the road“ eins og það heitir uppá engilsaxnesku.