Auðvelt að koma aftur inn í þetta lið

Þegar blaðamenn gengu inn í salinn í lok æfingar íslenska körfuboltalandsliðsins í Helsinki í gær sat Haukur Helgi Pálsson einn á varamannabekknum við hlið sjúkraþjálfara íslenska liðsins. Ekki var þó ástæða til að hafa neinar sérstakar áhyggjur af því þar sem hljóðið í Hauki sjálfum var gott eftir æfinguna.

„Staðan er þokkaleg á mér miðað við æfingu í dag. Ég kláraði æfinguna og var frekar góður,“ sagði Haukur sem missti af síðasta undirbúningsleik íslenska liðsins fyrir mótið.

Haukur Helgi er bjartsýnn á framhaldið eftir að hafa fengið að taka vel á því á gólfinu í Arena í gær. „Núna hef ég ekki spilað í viku. Pumpan er að komast af stað og ég er að venjast þessu aftur. Þetta er allt í góðu. Það er ennþá tími í fyrsta leik sem er mjög gott. Þetta lítur mjög vel út miðað við æfinguna í dag. Það er mikill spenningur og tilhlökkun í gangi núna,“ sagði Haukur.

Jón Arnór Stefánsson tók líka þátt í æfingunni í gær á fullu en þeir hafa báðir verið að missa úr leiki í lokaundirbúningnum. Svo vill til að þeir eru nú orðnir herbergisfélagar. „Finnarnir eru alveg að sjá um okkur. Ég held að við Jón höfum fengið aðeins stærra herbergi því það vilja margir hanga þar. Þetta er í fyrsta skiptið sem við erum herbergisfélagar. Hann er að kenna mér ýmsa hluti,“ segir Haukur léttur.

Þeir félagar voru einmitt tveir stigahæstu leikmenn íslenska liðsins á EM í Berlín fyrir tveimur árum, Jón Arnór með 13,6 stig í leik en Haukur með 12,8 stig í leik.

„Ég sé fyrir mér að mitt hlutverk verði svipað og fyrir tveimur árum. Mér fannst ég eiga frábært mót og ætla bara að halda því áfram núna í ár, ef ekki bara bæta við,“ segir Haukur en hann nýtti 56 prósent þriggja stiga skota sinna í Berlín 2015.

„Núna eru við komnir með marga aðra sem geta tekið við boltanum og búið eitthvað til. Það léttir því aðeins á mér og opnar vonandi fyrir fleiri en mig sjálfan. Að fá Martin og Tryggva inn sem eru að fá stór hlutverk núna og eru báðir að gera mjög vel. Það gerir ekkert nema að hjálpa. Þetta lítur mjög vel út og ég hlakka til,“ segir Haukur.

Hann hefur ekki áhyggjur af því að meiðslapésarnir og herbergisfélagarnir láti fjarveru sína að undan­förnu trufla sig eitthvað í fyrsta leik á móti Grikkjum á morgun.

„Ég er vanur að verða fyrir einhverju hnjaski og Jón líka. Þetta er nú þokkalega auðvelt fyrir okkur að koma aftur inn í þetta lið. Þetta breytist aldrei, það er alltaf sami mórall og við spilum líka eins. Við vitum allir hvað hver og einn getur gert. Það er því aðeins þægilegra að koma inn í þetta lið eftir smá stopp heldur en í önnur lið,“ segir Haukur. Það fer ekki framhjá neinum sem umgengst strákana að liðsheildin er gegnheil og sterk.

„Við erum búnir að spila saman í mörg ár og sérstaklega síðustu ár. Þetta er ennþá sama gamla góða formúlan; að berjast og gera það sem maður getur,“ sagði Haukur Helgi.

Fyrsti leikur íslenska liðsins er á móti Grikkjum klukkan 13.30 á morgun að íslenskum tíma. Þar verða þeir Haukur Helgi og Jón Arnór væntanlega í hópi þeirra fimm sem byrja leikinn fyrir Ísland.