Þingkona tekur áskorun um að mæta í lundasokkabuxum í þingsal

Hildur Sverrisdóttir, þingkona Sjálfstæðisflokksins, hyggst taka ansi skemmtilegri áskorun frá Nichole Leigh Mosty, þingkonu Bjartrar framtíðar, þegar Alþingi kemur saman í haust.

Áskorunin felst í því að mæta í forláta lundasokkabuxum til vinnu á þinginu en forsaga málsins er sú að í gærkvöldi deildi Hildur mynd af lundasokkabuxum á Facebook-síðu sinni og grínaðist með að hún hefði áhyggjur af því að við værum ekki að taka túrismann nógu langt.

Hildur segir í samtali við Vísi að Nichole hafi skorað eindregið á hana og maður skorist ekki undan slíkum áskorunum.

„Svo að ég mun mæta í lundasokkabuxunum í þingið einhvern tímann í haust - þannig að ég býst við því að þá að lokum verði þetta grín mitt á minn kostnað,“ segir Hildur létt í bragði.

Aðspurð hvar buxurnar góðu fáist segir Hildur að þær fáist í Stellu í Bankastrætinu á kostaprís.

„Þannig að þetta endar bara farsællega,“ segir þingkonan.