Hnattflugsþristur á leið til Keflavíkur

Douglas DC-3 flugvélin, sem er á leið umhverfis jörðina, fór á loft frá Narsarsuaq-flugvelli á Suður-Grænlandi nú síðdegis og áætlar lendingu á Keflavíkurflugvelli upp úr klukkan 23 í kvöld, að sögn Tómasar Dags Helgasonar, formanns Þristavinafélagsins. Brottför frá Grænlandi hafði þá frestast um sex klukkustundir vegna ísingarhættu og smávægilegrar bilunar.

Áformað hafði verið að flugvélin lenti í Reykjavík en þegar flugáætlun hafði verið uppreiknuð eftir flugtak frá Grænlandi kom babb í bátinn. Hún sýndi að vélin myndi ekki ná til Reykjavíkur fyrr en klukkan 23.18, en samkvæmt reglum flugvallarins eru lendingar bannaðar þar eftir klukkan 23. Því neyðist þristurinn til að lenda í Keflavík. Hér má fylgjast með flugferli vélarinnar.

Þessi 77 ára gamli forngripur er í sex mánaða hnattflugi á vegum svissneska Breitling-úraframleiðandans í því skyni að setja heimsmet. Henni er ætlað að verða elsta flugvélin til að fljúga umhverfis jörðina. Flugið hófst í Genf í marsmánuði og var förinni fyrst heitið um Miðausturlönd og Asíu. Síðustu vikur hefur leiðin legið yfir Ameríku en heimsreisunni lýkur í Sviss þann 13. september.

Á morgun, sunnudag, var fyrirhugað að íslenski þristurinn Páll Sveinsson og Breitling-þristurinn flygju saman yfir Reykjavík og nágrenni. Þrátt fyrir lendinguna í Keflavík vonast Tómas Dagur til að áhöfn Breitlings-þristsins fáist til að fljúga vélinni yfir til Reykjavíkur í fyrramálið svo að samflugið geti farið fram á morgun. Frá Íslandi er áætlað að hnattflugsvélin fljúgi til Skotlands á mánudag. 

Það verður sífellt fátíðara að svo gömlum flugvélum sé flogið til Íslands yfir úthafið. Þess er skemmst að minnast að Lancaster-sprengjuflugvél lenti í Reykjavík árið 2014 og Catalina-flugbátur kom árið 2012. Því má ætla að þessi heimsókn veki eftirtekt flugáhugamanna.