Fundu annan handlegg á botni Køgeflóa

Kafarar á vegum dönsku lögreglunnar hafa fundið annan handlegg á hafsbotni í Køgeflóa. Talið er að fundurinn gæti tengst máli danska uppfinningamannsins Peter Madsen.

Lögregla í Kaupmannahöfn greindi frá fundinum í yfirlýsingu fyrr í dag. Handleggur fannst á botni flóans þann 21. nóvember síðastliðinn á því svæði þar sem talið er að kafbátur danska uppfinningamannsins Peter Madsen hafi siglt áður en honum var sökkt í ágúst.

Enn á eftir að fá staðfest með lífsýnum hvort handleggirnir séu Kim Wall, en búkur hennar, höfuð og fætur hafa þegar fundist á hafsbotni í Køgeflóa. Köfun verður fram haldið, en enn á eftir að finna farsíma þeirra Wall og Madsen.

Madsen situr nú í gæsluvarðhaldi vegna gruns um að hafa banað sænsku blaðakonunni Kim Wall þegar þau ferðuðust saman í kafbát Madsen í ágúst síðastliðinn. Madsen hefur viðurkennt að hafa vanvirt lík Wall.

Áætlað er að aðalmeðferð hefjist í máli Madsen 8. mars næstkomandi.