Innlent

Panamaprinsalaus ríkisstjórn í burðarliðnum

Jakob Bjarnar skrifar
Lykillinn að þessari hugmynd um sex flokka stjórn er undirliggjandi þreyta með langvarandi vandræði sem tengjast spillingarumræðu.
Lykillinn að þessari hugmynd um sex flokka stjórn er undirliggjandi þreyta með langvarandi vandræði sem tengjast spillingarumræðu. Vísir/Guðmundur Snær

Samkvæmt heimildum Vísis er nú unnið að því markvisst að skrúfa saman stjórn sem samanstendur af öllum flokkum nema Sjálfstæðisflokknum og Miðflokknum. Katrín Jakobsdóttir, formaður Vg, myndi leiða þá ríkisstjórn. Þetta myndi þýða sex flokka ríkisstjórn og þarf vart að hafa um það mörg orð að hér yrði um sögulega tilraun að ræða varðandi ríkisstjórnarsamstarf.

Lykillinn þreyta gagnvart undirliggjandi spillingarumræðu
Miklar viðræður hafa verið í allan dag milli leiðtoga flokkanna og samkvæmt heimildum Vísis hafa þær viðræður þróast í þessa átt. Heimildarmaður Vísis orðar það svo að lykillinn að slíku mynstri er að stjórnin yrði Panamaprinsalaus, það er metið svo að þó spillingarmál tengd Panamaskjölunum hafi ekki verið ofarlega á baugi í kosningabaráttunni séu þau undirliggjandi ástæða þess að tvær síðustu ríkisstjórnir hafa sprungið í loft upp. Fólk bara er búið að fá nóg af slíku, að sögn eins viðmælanda Vísis. Nú ríður á að fá frið í stjórnmálunum. Er það metið svo að það yrði aldrei friður um ríkisstjórn með þá Bjarna Benediktsson og Sigmund Davíð innanborðs.

Ef þessi hugmynd gengur eftir verða þeir Bjarni og Sigmundur úti í sal og leiða stjórnarandstöðuna. visir/Valli

Framsókn hefur verið sögð í lykilstöðu í tengslum við stjórnarmyndun, þó blaðamanni Vísis hafi verið bent á að stjórn án Framsóknar sé vissulega inni í myndinni. Samkvæmt heimildum Vísis er einhugur um þessa hugmynd innan vébanda Framsóknarmanna og fór Sigurður Ingi Jóhannsson, formaður Framsóknar, býsna langt með að upplýsa um þessar þreifingar í kvöldfréttatíma RÚV í kvöld.

Engin óyfirstíganleg ágreiningsefni
Þeir sem Vísir talaði við voru á því að þetta gæti verið snjall leikur, Sjálfstæðisflokkurinn hafi staðið fyrir margvíslegum úrbótum fyrir þrifum að mati viðmælanda blaðamanns. En, nú sé hægt að skoða aðgerðir í húsnæðismálum, endurskipulagning fjármálakerfis að teknu tilliti til vaxtastefnu, samfélagsbanki var nefndur í eyru blaðamanns Vísis, lífeyrissjóðakerfið og svissneska leiðin svokölluð – menn sjá ekkert því til fyrirstöðu að klára þessi mál þó aðkoma svo margra flokka að ríkisstjórnarsamstarfi væri reyndin. Ekki ætti að þurfa að vera djúpstæður ágreiningur um endurskoðun stjórnarskrár sem og fiskveiðikerfisins. Klára þessi mál, segir einn viðmælandi Vísis í baklandinu, sem er mjög áfram um að á þetta verði látið reyna.

Jafnréttismálin í góðu horfi
Þá horfa heimildarmenn Vísis einnig til þess að erfiðar kjaraviðræður eru handan horns en bæði ASÍ og SA ættu greitt talsamband inn í ríkisstjórn Vinstri grænna, Samfylkingar, Framsóknarflokks, Viðreisnar, Pírata og Flokks fólksins. Og síðast en ekki síst jafnréttismálin því ef af þessu yrði eru meiri líkur en minni á að fleiri konur yrðu ráðherrar í slíkri ríkisstjórn en ekki. Ein helsta ástæða þess að ekki eru fleiri konur á þingi, sem svo mjög hefur verið gagnrýnt, er samsetning þingmannahópa Miðflokks og Sjálfstæðisflokks.

Ýmsir hafa túlkað niðurstöður kosninganna sem ákall um aukið samtal milli flokka. Sex flokka ríkisstjórn væri svar við slíku kalli. Liggi fyrir samkomulag milli þessara flokka hvað þetta varðar og innan tíðar er í raun ekkert því til fyrirstöðu að Guðni Th. Jóhannesson forseti lýðveldisins feli Katrínu Jakobsdóttur myndun slíkrar ríkisstjórnar.


Tengdar fréttir

Sigurður Ingi með trompin á hendi

Formenn stjórnmálaflokkanna gengu á fund forseta Íslands í gær. Margir báðu forsetann um svigrúm til að tala saman. Framsóknarflokkurinn er í algjörri lykilstöðu við myndunn nýrrar stjórnar.  

Aðstæður fyrir minnihlutastjórn betri en oft áður

Gunnar Helgi Kristinsson prófessor í stjórnmálafræði segir að ekki sé hefð fyrir minnihlutastjórnum hér á landi því Alþingi sé óvenjulega valdamikið þing og yfirleitt vettvangur opinberrar stefnumótunar. Hann segir að aðstæður fyrir minnihlutastjórn séu betri núna vegna breytinga á valdheimildum ráðherra.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.