Formannaáskorun Vísis: Ábrystir, Notting Hill og Hvítir Rússar

Þorvaldur Þorvaldsson, formaður Alþýðufylkingarinnar, segir tangó vera uppáhalds líkamsræktina. Hann spilaði blak í fyrrum kaþólskri kirkju í Shkodra í Norðurhluta Albaníu og er ekki viss um að Benedikt Erlingsson myndi ráða við að leika sig.

Þetta er brot af því sem kemur fram í svörum Þorvaldar við Formannaáskorun Vísis.

Vísir leggur mikið upp úr því að umfjöllunin um Alþingiskosningarnar sé ítarleg og úr öllum áttum, líka skemmtileg. Því lögðum við fyrir alla formenn skemmtilegan spurningalista með spurningum af öllu tagi, sumar erfiðari en aðrar en allar í persónulegri kantinum. Svör fleiri formannanna verða svo birt á næstu dögum og nú er komið að Þorvaldi Þorvaldssyni, formanni Alþýðufylkingarinnar.

Hver er fallegasti staðurinn á Íslandi?

Ásbyrgi.

Varstu sumar í sveit?

Ég var í sveit í Aðaldal nokkur sumur á 7. Áratugnum. Ég hef búið að því allar götur síðan.

Hvaða mat ert þú best/ur í að elda?

Lasagne della casa.

Hvernig bíl ekur þú og hefur þú gefið honum nafn?

Cherokee, árgerð 2002. Hann verðskuldar varla nafn. En ég þarf sæmilega öflugan bíl í vinnuna, og lítil efni til að endurnýja hann.

Hver er draumabíllinn?

Einhver rafmagnsbíll. Jafnvel Tesla, þegar maður hefur efni á honum, og ódýrari útgáfur koma á markað.

Besti hrekkurinn sem þú hefur gert?

Ég er svo hrekklaus að ég man ekki eftir neinu slíku.

Besti hrekkurinn sem þú hefur lent í?

Ég er líklega ekki nógu hörundsár til að muna eftir því.

Uppáhalds tónlistarmaður?

Dmitri Hvorostovsky.

Hefur þú komist í kast við lögin?

Ég var handtekinn fyrir brot á áfengislögum á þjóðhátíð í Vestmannaeyjum 1975, og dæmdur til 1000 króna sektar.

Uppáhalds föstudagskvöldsdrykkur?

White russian.

Uppáhalds bókin?

Tíu dagar sem skóku heiminn, eftir John Reed.

Uppáhalds bíómynd?

Október, eftir Sergei Eisenstein.

Uppáhalds „guilty pleasure“ bíómynd?

Notting hill.

Hvað er uppáhalds pepp-lagið þitt?

Bella ciao.

Hefur þú farið í Costco?

Nei.

Hefur þú farið í H&M á Íslandi?

Nei.

Hefur þú migið í saltan sjó?

Já, ég var á vetrarvertíð 1978.

Þegar þú ferð í fríið, sólarströnd eða menning?

Aðallega menning, en strönd getur orðið á vegi mínum ef svo ber undir.

Uppáhalds þynnkumatur?

Ábrystir, með kanil og berjasaft. Þær geta einnig verið meðlæti með Kúburommi.

Ananas á pizzu?

Einungis þegar skinka kemur við sögu.

Hvaða leikari væri fengin til að leika þig í bíómynd?

Kannski Benedikt Erlingsson, ef hann ræður við það.

Hvaða hreyfing er í uppáhaldi hjá þér?

Tango. Badminton kemur einnig til greina.

Trúir þú á líf eftir dauðan?

Já, líf annarra.

Hefur þú átt gæludýr?

Nei, ekki að eigin frumkvæði. En köttur var á heimilinu fyrstu tvö ár mín í sambúð.

Með hvaða liði heldur þú (íslensku)?

ÍA.

Sterkasta minning úr æsku?

Ein þeirra er ferð á sinfóníutónleika á Bifröst, líklega rétt fyrir miðjan 7. Áratuginn.

Hvað er það skrítnasta sem þú hefur gert?

Veit ekki. En ég hef spilað blak í fyrrum kaþólskri kirkju í Shkodra í Norðurhluta Albaníu, fyrir margt löngu.