Dauður fiskur á botni Varmár vegna mengunar

„Við fengum tilkynningu í síðustu viku um að það hefði komið upp mengun í Varmá úr regnvatnsstút sem liggur ít í læk sem síðan liggur út í Varmá,“ segir Árni Davíðsson heilbrigðisfulltrúi hjá Heilbrigðiseftirliti Kjósasvæðis. „Þetta virðist hafa verið einhverskonar hvítt efni sem lak út í ána en við vitum svosem ekki hvað það var.“

Vegfarendur í Mosfellsbæ hafa orðið varir við mengun og dauða fiska í Varmá. Heilbrigðiseftirlit Kjósasvæðis er með málið til skoðunar en uppspretta mengunarinnar hefur enn ekki fundist.

Um helgina hafa íbúar í Mosfellsbæ deilt myndum á samfélagsvefjum þar sem sjá má mengun í Varmá. Áin virðist skýjuð og á sumum myndum má sjá dauða fiska í ánni.

„Svo gerist það á föstudagskvöld að menn finna dauða fiska í ánni,“ segir Árni. „Svo núna um helgina heldur það á fram en við vitum í sjálfu sér ekki hvart það sé sami mengunarvaldur sem veldur því núna að fiskarnir drepast.“

Enn eigi eftir að finna út hver mengunarvaldurinn sé og hvar hann eigi sér upptök. Alltaf þegar fulltrúar eftirlitsins hafi mætt á svæðið hefur mengunin skolast burt.

„Við höfum nokkur sýni af dauðum fiskum,“ segir Árni. „Við munum kanna það með fræðimönnum eða þeim sem eru vanir því að kryfja fiska hver dánarorsök þeirra er.“

Þá mun eftirlitið fylgjast vel með ánni og biður almenning einnig um að vera vakandi fyrir mengun sem þessari.

„Það er náttúrulega mjög mikilvægt ef að fólk sér svona að tilkynna það inn til okkar og láti þá vita um staðsetningu og tíma og sendi þá myndir. Einnig að menn geri það sem fyrst svo að við náum á staðinn áður en mengunin er horfin,“ segir Árni.