Flestir stukku á femínistavagninn í meistaraverkskeppni Strætó

Strætisvagn skreyttur skammstöfuninni KÞBAVD fékk flest atkvæði í meistaraverkskeppni Strætó sem lauk nú á miðnætti. Vagninn hlaut 6960 atkvæði en í öðru sæti var skátavagninn Change með 6783 atkvæði. Keppnin var afar spennandi á lokametrunum enda vagnarnir tveir hnífjafnir síðustu sólarhringana. 

KÞBAVD er skammstöfun á frasanum „konur þurfa bara að vera duglegri“ sem er að sögn Lenu Margrétar Aradóttur, hönnuðar vagsins, kaldhæðin ádeila í jafnréttisumræðunni.

„Í fjölmiðlum og annars staðar er oft talað um að konur beri ábyrgð á því misrétti sem þær verði fyrir og að þær geti losað sig úr þeirri stöðu sem þær eru í með því að gera hitt og þetta,“ segir Lena Margrét. Til dæmis þurfi þær að vera duglegri við að passa sig, við að biðja um launahækkun eða við að vera ekki dramatískar.

Lena útskýrir að skammstöfunin hafi orðið til í facebook-hópi sem fjölmargir femínistar eru meðlimir í.

„En það eru margir sem vita ekki hvað þetta þýðir og það er einmitt það sem er skemmtilegt við þetta. Þetta skapar umræðu því fólk er forvitið. Það segir hvað er þessi óþjála skammstöfun? Sumum finnst mjög asnalegt að það standi á vagninum að konur þurfi að vera duglegri að gera hluti af því þau fatta ekki að þetta sé kaldhæðin ádeila og segja bíddu afhverju á ég að vera kjósa þennan vagn sem er niðrandi fyrir konur,“ segir Lena Margrét og hlær.

Nokkrar villur komu upp við framkvæmd kosningarinnar. Þegar leyst hafði verið úr fyrstu villunni skapaðist umtal um að fólk gæti náð sér í nýjan vafra og kosið þannig oftar. Sú var raunin í töluverðan tíma og voru í kjölfarið atkvæði þeirra sem kusu oftar en einu sinni hreinsuð út.

Ekki liggur fyrir hversu lengi strætisvagn verður skreyttur sigurtillögunni.

„Þetta er gert fyrir skemmtanagildið og vonandi sjá allir þann vinkil á þessu,“ sagði Jóhannes S. Rúnarsson, framkvæmdastjóri Strætó, í samtali við fréttastofu fyrr í dag.