Íslandsbanki verður seldur að fullu en 35-40% í Landsbanka haldið eftir

Stefnt er að því að selja allan eignarhlut ríkisins í Íslandsbanka og Arion banka þegar hagfelld og æskileg skilyrði eru fyrir hendi. Þetta kemur fram í nýrri eigendastefnu ríkisins fyrir fjármálafyrirtæki.

Ríkið er alltumlykjandi á fjármálamarkaði. Ríkissjóður á nær allt hlutafé í Landsbankanum, á Íslandsbanka að fullu og 13 prósenta hlut í Arion banka.

Núverandi ríkisstjórn hefur lýst því markmiði að minnka eignarhlut ríkisins í bönkunum en í stefnuyfirlýsingu ríkisstjórnarinnar segir að til langs tíma litið sé ekki ákjósanlegt að ríkið farið með meirihlutaeign í viðskiptabönkunum.

Í nýrri eigendastefnu ríkisins sem birtist á vef fjármála- og efnahagsráðuneytisins í dag lýsa stjórnvöld markmiðum sínum varðandi eignarhald á bönkum og fjármálafyrirtækjum.

Um Landsbankann segir: „Stefnt er að því að ríkið eigi verulegan eignarhlut, 34-40%, í bankanum til langframa til að stuðla að stöðugleika í fjármálakerfinu og tryggja nauðsynlega innviði þess. (...) Stefnt er að því að selja allan eignarhlut ríkisins í Íslandsbanka þegar hagfelld og æskileg skilyrði eru fyrir hendi.“ Um Arion banka segir: „Stefnt er að því að selja allan eignarhlut ríkisins þegar hagfelld og æskileg skilyrði eru fyrir hendi.“

Hvenær verða þessi skilyrði fyrir hendi? Hvað mælir gegn því að selja hlut ríkisins í bönkunum núna þegar íslenskt hagkerfi er á toppi hagsveiflunnar?

Það getur skipt máli hvaða framboð er af öðrum fjárfestingarkostum innanlands. Þá hafa lífeyrissjóðirnir verið hvattir til að fjárfesta erlendis í auknum mæli.

Stefán Broddi Guðjónsson forstöðumaður greiningar Arion banka segir að þetta geti mælt gegn sölu um þessar mundir. Hann segir að þótt aðstæður til að selja bankana séu góðar núna séu aðrar hagstjórnarlegar ástæður sem mæli gegn því.

„Það er kannski ekki æskilegt eða heppilegt út frá öllum markmiðum eigendastefnunnar að ætla að sækja fjármagn til þessara aðila (innsk.lífeyrissjóða) um leið og við viljum frekar að þeir noti núverandi aðstæður til að auka eignir sínar erlendis,“ segir Stefán Broddi.

Einkavæðing á hlut ríkisins í bönkum í byrjun þessarar aldar olli langvinnum deilum og markaði djúp spor í þjóðfélagsumræðuna hér á landi.

Höfum við ekki öll þau tæki sem eru nauðsynleg til þess að selja þessa banka á sanngjarnan hátt, til dæmis í gegnum Kauphöll Íslands, sem var ekki gert á sínum tíma?

„Ég held að við séum með öll þau tæki til staðar sem ættu að geta leitt okkur að mjög farsælli niðurstöðu. Umhverfið hér er sambærilegt því sem við þekkjum í okkar nágrannalöndum þar sem skref hafa verið farsællega stigin. Smá og örugg skref sem leitt hafa til niðurstöðu sem þokkaleg sátt er um,“ segir Stefán Broddi.