Bjarga þurfti manni sem stökk út í Ölfusá

Uppfært klukkan 14:35

Fyrirsögnfréttarinnar var breytt þar sem hún benti til þess að mennirnir hefðu fallið í ána fyrir slysni.

Bjarga þurfti manni sem stökk út í Ölfusá í nótt. Félagi hans fór á eftir honum auk lögreglumanns. Allir björguðust úr ánni en voru fluttir á slysadeild á Selfossi til aðhlynningar.

Atvikið átti sér stað við Ölfusá neðan við sláturfélagið en einn maður hoppaði í ánna og fór félagi hans á eftir honum til þess að bjarga honum.

Lögregla og sjúkrabílar voru sendir á vettvang og fór einn lögreglumaður í ána. Öllum mönnunum var bjargað í land skömmu síðar og þeir fluttir á Heilbrigðisstofnun Suðurlands til aðhlynningar.

Þá var bæjarhátíðin Kótelettan haldin á Selfossi um helgina og var mikill erill hjá lögreglu á staðnum í nótt, sem þurfti að sinna fjölmörgum útköllum, meðal annars á tjaldsvæðinu á Selfossi vegna ölvunar hátíðargesta.