Leituðu í brunarústunum í alla nótt

Slökkiliðsmenn hafa unnið í alla nótt í brunarústum Grenfell turnsins Kensington í Lundúnum sem brann til kaldra kola í gærnótt. Enn logar í glóðum hér og þar í húsinu en björgunarfólk leitaði að manneskjum í húsinu í nótt og er nú staðfest að tólf hafi látist.

Mun fleiri er þó saknað og varar lögreglan við að dánartalan eigi eftir að hækka. Sextíu og fimm manns var bjargað úr húsinu en ekki liggur nákvæmlega fyrir hversu margir bjuggu þar, en í turninum voru 120 íbúðir. Þrjátíu og fjórir eru enn á spítala og þar af eru átján á gjörgæslu.