Innlent

Ákvörðun Ríkislögreglustjóra byggð á upplýsingum sem erfitt er að fjalla um

Borgarstjóri og þingmaður Vinstri grænna segjast ekki hafa fengið fullnægjandi skýringar á því hvers vegna sérsveitarmenn þurfi að hafa vopnin sýnileg á viðburðum í sumar. Ríkislögreglustjóri fundaði með Allsherjarnefnd Alþingis í dag en boðað hefur verið til mótmæla á Austurvelli á morgun vegna ákvörðunarinnar.

Ríkislögreglustjóri og lögreglustjórinn á höfuðborgarsvæðinu voru boðaðir á fund Allsherjarnefndar Alþingis klukkan níu í morgun vegna ákvörðunar Ríkislögreglustjóra um að sérsveitarmenn beri sýnilega skotvopn á viðburðum þar sem fjölmenni kemur saman í sumar. Þá var einnig til umræðu aukinn viðbúnaður almennrar löggæslu við sömu aðstæður.

Dagur B. Eggertsson, borgarstjóri og Líf Magneudóttir, forseti borgarstjórnar, voru einnig boðuð til fundarins en þau hafa bæði gagnrýnt að borgaryfirvöld hafi ekki verið látin vita fyrir fram af ákvörðun Ríkislögreglustjóra.

Eftir fundinn sagði Dagur enn ekki hafa skilning á ákvörðun Ríkislögreglustjóra.

„Þarna kom þó fram að á hverjum tíma gæti lögreglan verið með upplýsingar sem hún gæti ekki deilt með öðrum og ég held að þessar umræður og þetta mál í heild sinni undirstriki að við þurfum að bæta samráðið og ferlana,“ sagði Dagur B. Eggertsson, borgarstjóri að loknum fundi í morgun.

Dagur sagði að það væri breið samstaða um það að Ísland sé vopnlaust land og að yfirbragð almennrar löggæslu eigi að vera sýnilegt og vopnlaust en hitt eigi að heyra til algera undantekninga og þurfi að styðjast við sérstök rök.

„Ég held að okkur hafi nú tekist bærilega upp við það að upplýsa, ég er ekki viss um að allir séu kannski sammála um það, en við fórum yfir rökin fyrir því að við erum með þessar ráðstafanir, tímabundið núna í sumar,“ sagði Haraldur Johannessen, ríkislögreglustjóri.

Haraldur segir að ákvörðun Ríkislögreglustjóra verði endurskoðuð eftir verslunarmannahelgi en þá verði hættumat greiningardeildar embættisins endurskoðað. Hættumatið sem unnið var fyrir lögreglustjórann á höfuðborgarsvæðinu vegna viðburða í borginni í sumar hafi kallað á þessar aðgerðir.

„Og hún er líka byggð á upplýsingum sem að við eigum erfitt með að fjalla um,“ segir Haraldur.

Haraldur segir þó að megin ástæðan fyrir þessari ákvörðun hafi verið sú hryðjuverkaógn sem vofir yfir Evrópu og þeir hræðilegu atburði sem hafa átt sér stað á nágrannalöndunum að undanförnu. Hann ítrekar að embætti ríkislögreglustjóra búi ekki yfir upplýsingum um að hér á landi sé í undirbúningi ódæðisverk.

„Ef að það væri þámyndum við greina frá því. Við viljum hafa varann á okkur og gera það sem við getum til þess að tryggja öryggi almennings því að sjálfsögðu er það hlutverk lögreglunnar,“ segir Haraldur.

Andrés Ingi Jónsson, þingmaður Vinstri grænna óskaði eftir fundi nefndarinnar með Ríkislögreglustjóra í dag en eftir hann segist Andrés enn ekki hafa fulla skilning á ákvörðun Ríkislögreglustjóra.

„Ég er enn þá pínulítið að klóra mér í kollinum. Ég sé ekki til dæmis afhverju ekki myndi duga að hafa þessa vopnuðu sérsveitarmenn bara til taks, ekki á hátíðarsvæðinu heldur bara í sendibíl til hliðar,“ sagði Andrés Ingi Jónsson, þingmaður Vinstri grænna.

 


Tengdar fréttir

Fundur þjóðaröryggisráðs stóð í tæpa fjóra tíma

Fundi þjóðaröryggisráðs lauk nú á sjötta tímanum en ráðið kom saman til fundar klukkan tvö í dag á öryggissvæðinu á Keflavíkurflugvelli, fyrrum umráðasvæði bandaríska varnarliðsins á Miðnesheiði.

Fleiri í stöðugu eftirliti lögreglunnar

Vopnuð sérsveit verður áfram á fjölmennum viðburðum þar til annað verður ákveðið að sögn Ríkislögreglustjóra. Hann segir að fjölgað hafi á lista yfirvalda yfir vaktaða einstaklinga.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.