Duterte boðið í Hvíta húsið

Donald Trump, forseti Bandaríkjanna, hefur boðið Rodrigo Duterte, umdeildum forseta Filippseyja, í Hvíta húsið. Leiðtogarnir ræddu saman í síma í gær en ekki hefur verið ákveðið hvenær Duterte heimsækir Bandaríkin.

Reuters-fréttastofan segir að Trump og Duterte hafi meðal annars rætt um málefni Norður-Kóreu í símtali sínu í gær. Hefur hún eftir embættismönnum Hvíta hússins að Trump hlakki til heimsóknar sinnar til Filippseyja sem áformuð er í nóvember.

Þrátt fyrir að Duterte sé vinsæll í heimalandinu hefur hann sætt gagnrýni alþjóðasamfélagsins, ekki síst vegna herferðar sinnar gegn glæpum. Þúsundir meintra glæpamanna hafa verið drepnir af lögreglu frá því að Duterte tók við embætti í fyrra.

Þegar Barack Obama, forveri Trump í embætti Bandaríkjaforseta, gagnrýndi mannréttindabrot Duterte í fyrra kallaði filippseyski forsetinn hann „tíkarson“.