Snorri vill margra ára laun frá Akureyrarbæ

Snorri Óskarsson, oftast kenndur við hvítasunnusöfnuðinn Betel, hefur stefnt Akureyrarbæ og krefst vangoldinna launa og miskabóta vegna ólöglegrar uppsagnar hans úr starfi. Hann telur formann Samfylkingarinnar vera manninn á bak við aðför að sér.

Snorra var í júlí árið 2012 vikið úr starfi sem grunnskólakennari. Ástæða uppsagnar hans voru umdeildar bloggfærslur Snorra þar sem hann skrifaði um samkynhneigð út frá sínu strangkristna hugarfari. Var að mati bæjaryfirvalda ekki talið eðlilegt að kennari grunnskólabarna léti uppi skoðanir sínar á þann hátt að samkynhneigð væri synd og þeirra biði ekkert nema helvíti. „Samkynhneigð telst vera synd,“ skrifaði Snorri.

„Syndin erfir ekki Guðs ríkið og því óæskileg. Laun syndarinnar er dauði og því grafalvarleg.“

„Bæði tjáði hann sig fyrstur um uppsögn mína og fagnaði henni opinberlega. Síðan gekk hann í það verk að loka leikskólanum Hlíðabóli sem hvítasunnukirkjan rak með þeim afleiðingum að börn komast ekki inn á leikskóla í bænum. Síðan í málinu sem ég rek núna þá ver eiginkona Loga Más Akureyrarbæ í málinu. Þetta er því alfarið hans arkitektúr,“ segir Snorri.

Logi Már vísar þessum ummælum alveg á bug og bendir á að hann hafi ekki verið í meirihluta þegar Snorri var rekinn. „Þetta er algjör fásinna. Fyrir það fyrsta var ég ekki í bæjarstjórn þegar hann var rekinn. Þó ég sé sammála endanlegri niðurstöðu ber ég enga ábyrgð á uppsögn hans eða hvernig að henni var staðið,“ segir Logi Már. „Á þessum tíma var ég fulltrúi minnihluta í skólanefnd.“

Uppsögnin hefur frá þeim tíma margoft verið dæmd ólögmæt og krefst því Snorri bæði ógreiddra launa í tvö og hálft ár auk tapaðra lífeyrisréttinda. Einnig óskar hann launa næstu fimm árin, eða til sjötugs.

„Það er eðlilegt að ég leiti réttar míns. Margsinnis hefur verið dæmt um að uppsögn mín var ólögmæt. Krafan mín nú hljóðar upp á um 13,7 milljónir króna fyrir tapaða vinnu. Síðan ef ég fæ ekki vinnu þá mun ég krefjast launa til sjötugs,“ segir Snorri. 

Fréttin birtist fyrst í Fréttablaðinu