Hagar kaupa Olís

Hagar undirrituðu í dag kaupsamning um kaup á öllu hlutafé Olís og fasteignafélagsins DGV. Félagið starfrækir það um 115 starfsstöðvar á um 50 stöðum á landinu, aðallega undir merkjum Olís, ÓB og Rekstrarlands. Þá á Olís 40% í Olíudreifingu ehf.

DGV ehf. er fasteignafélag sem á um 3.000 m²  fasteign auk lóðaréttinda sem ekki tengjast rekstri Olís. Heildarvelta Olíuverzlunar Íslands var um 31 milljarður árið 2016.

Heildarvirði Olís er 15,1 milljarður króna og vaxtaberandi skuldir 5,9 milljarðar. Kaupverð hlutafjár er því tæpir 9,2 milljarðar króna. Í tilkynningu til Kauphallar Íslands segir þó að endanlegt kaupverð getu þó tekið breytingum vegna afkomu Olís á árinu 2017.

Kaupsamningurinn er gerður með fyrirvara um niðurstöður áreiðanleikakönnunar, samþykki hluthafafundar fyrir aukningu hlutafjár og samþykki Samkeppniseftirlitsins. Gangi þeir fyrirvarar eftir má gera ráð fyrir að gengið verði frá viðskiptunum undir lok þessa árs.

Finnur Árnason segir samninginn skapa fjölmörg tækifæri til að bæta þjónustu við viðskiptavini félagsins. „Rekstur Olís fellur mjög vel að rekstri Haga og skapar einstakan grundvöll til sóknar og ekki síður til aukinnar hagkvæmni í breyttu samkeppnisumhverfi,“ segir hann.