Aprílspá Siggu Kling – Meyjan: Það þýði ekki að kvíða því sem er ekki komið

Elsku Meyjan mín, þú ert að fara inn í tímabil þar sem andleg velferð þín verður eitthvað svo dásamlega hressandi og djúp. Það sem einkennir þig er hjálpsemi og þú munt eyða miklu af tíma þínum á næstunni í að hugsa um aðra og gefa af þér miklu meira en þú kannski getur, enda var Hrói höttur í meyjunni, en ég er svo sem ekki að benda á það að þið eigið að stela frá öðrum, en allavega hjálpsemina.

Fólk mun líta þig allt öðrum og betri augum en það hefur gert, það er eins og ólíklegasta fólk skilji þig betur og sýni þér virkilega hvers mikils virði því finnst þú vera. Þetta er kafli í lífinu þínu þar sem þú hættir að spá svona langt fram í tímann. Það er eins og það komi til þín kraftaverk – það þýði ekki að kvíða því sem er ekki komið, og þess vegna ert þú að sigrast á hindrunum þínum á miklu rólegri og yfirvegaðri máta en þú hefur gert áður.

Mjög algengt verður að þið farið að læra jóga eða farið í eitthvað nýtt sem setur ykkur í þennan ótrúlega flotta hlutlausa gír, því farartækið ykkar er alveg með sýn á hvert það vill fara, þú ert búinn að stimpla það inn í lífsorkuna og ert að fara að ýta á enter! Friður myndast í fjölskyldum og samningar verða gerðir til þess að einfalda lífið þitt – ég veit ekki nákvæmlega hvers konar samningar, en allavega stendur þú uppi sem sigurvegari því að þú ert að draga inn í hjarta þitt svo miklu meira sjálfstraust en þú hefur haft.

Að vera heiðarleg skiptir þig alveg svakalega miklu máli, svo steinhættu að skipta svona oft um skoðun, nýttu þér þessa þrjósku til að efla andann og hreinsa út veikindi. Þegar þú stendur upp getur ekkert stöðvað þig. Það er svo mikilvægt að það sé rómantík í kringum þig, þú þarft á hrifningu að halda, en ef þú ert ekki að fá þessa hrifningu eða rómantík sem þér finnst svo mikilvæg, skaltu bara skapa hana sjálf.

Þetta er allt undir þér komið, engum að þakka né kenna nema sjálfri þér. Og þar sem þú hefur verið svo heppin að fæðast meyja þarftu ekki að væla yfir neinu, því velferðin heldur í höndina á þér.

Mottó – Farðu með flæðinu

Frægar Meyjur: Ragna Lóa Stefánsdóttir íþróttakona, Manuela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Eva Dögg Sigurgeirsdóttir, ritstjóri og tískugúrú, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson tónlistarmaður, Selma Ragnars, fatahönnuður Íslands, Lalli Johns góðkunningi lögreglunnar, Sema Erla Serdar, baráttukona.