Aprílspá Siggu Kling – Sporðdrekinn: Það fer þér svo miklu betur að sitja á fremsta bekk

Elsku Sporðdrekinn minn, það virðist vera álag í kringum þig eða vinnu þína. Álag er ekki merki um að það sé endilega svo mikið að gera, heldur getur þú haft miklar áhyggjur af verkefnum hvort sem þau eru smá eða stór. Þér finnst svolítið erfitt að raða saman hlutunum, ert að spá í hvernig þetta smellur allt saman.

Apríl og maí lagfæra svo ofsalega mikið í sambandi við þetta, setja velmegun inn sem mér sýnist beinlínis tengjast peningum. Þú þarft að passa þig að vera ekki fljótfær þó að peningar birtist þér, heldur er gott að vera búinn að ákveða hvað þú þarft að leysa. Það býr svo mikil viska innra með þér, og þú getur verið svo dásamlega orðheppinn, leyfðu þér að segja það sem þér finnst, hættu að halda aftur af þér.

Það fer þér svo miklu betur að sitja á fremsta bekk og í öllum þessum styrk sem þú hefur ertu samt svo ofurviðkvæm sál, en þarft bara að ná jafnvægi á milli yin og yang! Þú hefur þann hæfileika að geta náð svo langt en til þess þarftu bara að henda þér út í djúpu laugina, annars flækjast hugsanir þínar of mikið fyrir þér eins og gaddavír!

Í ástamálunum er það eina sem þú þarft að gera, hvort sem þú ert í föstu sambandi eða laflaus, að treysta, um leið og þú sýnir traust og slakar á er ekkert sem verður hindrun hjá þér. Þegar þú varst yngri varstu með svo mikið ímyndunarafl, en þú átt það til að telja þér trú um að þú þurfir að vera svo agaður að annað sé ekki boðlegt, og með því slekkurðu á ímyndunarafli ævintýranna sem eru að banka upp á hjá þér.

Það er svo oft hægt að þekkja þig úr 100 manna hóp vegna þess hversu geislandi augu þín eru. Þegar þú ert ástfanginn, þá geislarðu eins og jólatréð á Ingólfstorgi, sem fer þér svo vel og núna er hárrétti tíminn til að sveifla veiðistönginni og draga að landi einhvern fínan lax sem þér finnst feitur. Þú hefur veiðistöngina og beituna en verður líka að hafa viljann!

Mottó – Ég er tilbúinn fyrir hamingjuna

Frægir Sporðdrekar: Birkir Már Sævarsson landsliðsmaður, Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari, Björk, Indira Ghandi, Karl bretaprins, Hillary Clinton, Leonardo DiCaprio, Magnús Scheving,  Steingrímur Sævarr Ólafsson fjölmiðlaráðgjafi, Hendrika Waage.