Túristar á Íslandi hafðir að féþúfu

Kolbeinn Tumi Daðason skrifar 22. mars 2017 13:30

Íslenskur hrossaskítur bragðast eins og Sterkar djúpur en er 300 prósent dýrari. Hið sama gildir um sælgæti af ýmsum toga þegar það er markaðssett fyrir ferðamenn. Vísir

Lundaegg eða Djúpur? Möndlur eða Lava Sparks? Líklega er flestum Íslendingum sama enda er bragðið nákvæmlega það sama. Ferðamenn átta sig þó líklega ekki á möguleikanum á að kaupa sömu vöru á næstu grösum á mun ódýrara verði.

Fjallað er um málið á ferðamannasíðunni Must See in Iceland sem leggur upp með að aðstoða ferðamenn að komast ódýrt frá veru sinni á Íslandi. Eru ferðamenn meðal annars minntir á að þeir geta keypt áfengi ódýrara í fríhöfninni við komuna til landsins, fara í bíó á þriðjudögum og fleira í þeim dúrnum.

Ísland er á nýjan leik orðið eitt dýrasta land í heimi, eins og tilfellið var fyrir fall bankanna haustið 2008. Svo sterk var krónan gagnvart dollara árið 2005 að kaupa mátti dollara fyrir rúmar 60 krónur svo dæmi sé tekið um stöðu gjaldmiðilsins sem hefur einmitt styrkst verulega undanfarið.

Lundaeggin njóta mikilla vinsælda á Íslandi undir heitinu Djúpur.

Möndlur eða hraunneistar?

Lundabúðirnar, og sömuleiðis bókabúðir og aðrar verslanir á Íslandi, bjóða til sölu sælgæti í sérmerktum umbúðum þar sem íslenskt sælgæti er markaðssett fyrir ferðamenn. Sniðug hugmynd en verðmunurinn er sláandi, í það minnsta að mati greinarhöfundar á Must See in Iceland.

„Ekki kaupa fáránlega dýrt nammi í lundabúðunum,“ segir í umfjölluninni en þrjár tegundir sælgætis voru teknar fyrir og framkvæmdur verðsamanburður. Annars vegar verð sælgætisins í Bónus, þar sem það er að öllum líkindum ódýrast, og hins vegar í lundabúðunum.

Möndlurnar frá Freyju eru seldar undir heitinu Lava Sparks, eða hraunneistar. Verðið fyrir 150 grömm í Bónus er 215 krónur en í lundabúðunum 990 krónur. Munurinn er 775 krónur eða sem svarar til 360 prósenta.

Íslenski hestaskíturinn, eða Sterkar djúpur.

Hestaskítur

Djúpurnar frá Freyju eru seldar undir heitinu Icelandic Puffin Eggs, eða íslensk lundaegg. Pokinn í Bónus kostar 298 krónur en 990 krónur í lundabúðununum. Munurinn er 232 prósent.

Að lokum eru það Sterkar Djúpur frá Freyju sem kosta 249 krónur í búðinni en 990 krónur í lundabúðunum. markaðssett sem Icelandic Horse Doo Doo eða íslenskur hrossaskítur. Munurinn er 741 króna eða 298 prósent.

Eru ferðamenn hvattir til að kaupa sælgætið í matvöruverslunum en ekki í lundabúðunum.

„Sparaðu þér muninn og nýttu í að upplifa geggjaða tíma í okkar yndislega landi. Því þessi sælgætisskandall er rán í dagsbirtu.“

Ferðamennska á Íslandi

Tengdar fréttir

Varan verður að standa undir verðmiðanum

Magnea Þórey Hjálmarsdóttir hefur verið framkvæmdastjóri Icelandair Hotels frá árinu 2005. Hún telur að "þetta reddast“ viðhorfið dugi ekki lengur til í móttöku ferðamanna á Íslandi. Ef allir verðleggja sig hátt er hætta á að fólk upplifi landið dýrt miðað við gæðin.

19. október 2016 09:30