Loftrýmisgæsla NATO við Ísland hefst að nýju

Loftrýmisgæsla Atlantshafsbandalagsins við Ísland hefst formlega að nýju fimmtudaginn 16. mars með komu flugsveitar ítalska flughersins. Þetta kemur fram í tilkynningu frá Landhelgisgæslu Íslands.

Þar segir að allt að 180 liðsmenn muni taka þátt í verkefninu og til viðbótar starfsmenn frá stjórnstöð NATO í Uedem, Þýskalandi (Combined Air Operations Center). Flugsveitin kemur til landsins með sex Eurofighter Typhoon F-2000 orrustuþotur.

Gert er ráð fyrir aðflugsæfingum að varaflugvöllum á Akureyri og Egilsstöðum á tímabilinu 21. mars til 24. mars.

Verkefnið verður framkvæmt með sama fyrirkomulagi og fyrri ár og í samræmi við loftrýmisgæsluáætlun NATO fyrir Ísland. Ráðgert er að verkefninu ljúki miðjan apríl. Verkefnið er framkvæmt af starfsmönnum Landhelgisgæslu Íslands á öryggissvæðinu á Keflavíkurflugvelli í samvinnu við Isavia.