Porsche Cayenne Turbo S E-Hybrid verður 671 hestöfl

Porsche ætlar að gæða öflugustu gerð Cayenne jeppans, Turbo S, með rafmótorum og fyrir vikið verður til lang öflugasta framleiðslugerð bílsins. Þessi stóri og þungi bíll verður svo öflugur að hann kemst á 100 km hraða á 3,4 sekúndum.

Bíllinn fær 14,1 kW rafhlöður sem duga bílnum til aksturs á rafmagninu eingöngu fyrstu 50 kílómetrana. Brunavélin í bílnum er 4,0 lítra V8, gríðaröflug vél en svo bætist afl rafmótoranna við. Tog aflrásarinnar er 850 Nm og hámarkshraði bílsins 310 km/klst. Það kemur ef til vill ekkert á óvart að öflugasta gerð Cayenne jeppans verði brátt með rafmótorum því Porsche hefur líst því yfir að notkun rafmótora muni aukast mjög í bílum þeirra á næstunni.

Þetta eru líka góðar fréttir fyrir áhugasama kaupendur á þessum bíl hér á landi, því með tilkomu rafmótoranna fellur þessi bíll kannski í vörgjaldslausan tollflokk í stað þess að vera í þeim hæsta, með 65% tollaálag. Því gæti farið svo að þessi bílgerð sé allt í einu orðin söluvara aftur hérlendis. Það hefur einnig heyrst úr herbúðum Porsche að næsta kynslóð 911 bílsins verði með rafmótorum til aðstoðar öflugum brunavélunum sem í bílunum eru.