Kepptust um orðið í umræðu um áfengismálið: „Slappaðu aðeins af“

Það var tekist hressilega á í umræðum um áfengisfrumvarpið í Silfrinu í Sjónvarpinu í dag. Þar spurði þáttastjórnandinn Egill Helgason þingmennina Kolbein Óttarsson Proppé úr Vinstri grænum, Hönnu Katrínu Friðriksdóttur úr Viðreisn, Birgittu Jónsdóttur úr Pírötum og Brynjar Níelsson úr Sjálfstæðisflokknum um málið og voru mismunandi skoðanir á því.

Þeir Kolbeinn og Brynjar og voru sérstaklega ósammála um málið og kepptust við að hafa orðið á tímabili.

Brynjar sagðist vera þeirrar skoðunar að byrja ætti á því að afnema ríkiseinokun á sölu áfengis og að einkaaðilar myndu þá reka sérstakar áfengisverslanir, í ætt við apótek, en ekki byrja á því að selja áfengi í matvöruverslunum.

„Við fengjum okkur oftar“

„Vandamálið kannski við þetta að hafa þetta inni í verslunum væri það að við fengjum okkur oftar. Þeir sem eru að misnota þetta, þeir bjarga sér alltaf,“ sagði Brynjar.

Kolbeinn sagði alla sammála um að áfengi sé ekki eins og hver önnur neyslu vara og að það þurfi að gilda sérreglur um það.

„Um leið og þú ert búinn að samþykkja það,“ sagði Kolbeinn en þá reyndi Brynjar að skjóta sér inn en Kolbeinn bað vinsamlegast um að fá að klára mál sitt.

„Þá snýst þetta orðið á endanum um það hvort að ríkið hafi einkaleyfi á því að meðhöndla þetta sem hefur verið skilgreint sem fíkniefni og vímuefni,“ sagði Kolbeinn.

Á ábyrgð þeirra sem vilja breyta kerfinu

Hann sagði það vera á ábyrgð þeirra sem vilja breyta kerfinu að fullvissa og sannfæra þjóðina um það að frjáls sala áfengis muni ekki hafa þær afleiðingar sem landlæknir og lýðheilsustöðvar hafa spá fyrir um og hafa vitnað í gögn frá öðrum löndum máli sínu til stuðnings.

„Kolbeinn, menn geta alltaf sagt eitthvað svona,“ sagði Brynjar Níelsson.

„Þetta er satt,“ skaut Kolbeinn inn í umræðuna en þá sagði Brynjar: „Slappaðu aðeins af.“

„Vilt þú að hver sem er geti keypt áfengi,“ spurði Kolbeinn.

„Leyfðu mér aðeins að komast að,“ sagði Brynjar sem sagði Landlækni hafa það hlutverk að gæta heilsu þjóðarinnar og vilja helst ekki hafa áfengi í landinu.

„Ríkið þarf ekki að sjá um það“

„Ég er bara að segja það að það blasir samt við okkur og þrátt fyrir þetta að vínbúðum hefur fjölgað hér um tugi ef ekki hundruð prósenta á síðustu árum. Það er vínveitingaleyfi gefið út á hverjum degi en samt hefur drykkja ungmenna minnkað hvað ætlar Landlæknir að segja við því? Þetta er bara staðreynd. Ég ætla hins vegar ekki að mæla með því, ég lít á áfengi eins og apótek. Það eru reglur um það hvernig menn afgreiða það og einkaaðilar sjá um það, ríkið þarf ekki að sjá um það Kolbeinn,“ sagði Brynjar og bætti við:

„Þú ert alveg ótrúlega mikill ríkissinni.“

„Æi, elsku Brynjar minn, ekki fara niður á þetta plan,“ svaraði Kolbeinn en Brynjar sagði hann ekki vilja afnema ríkiseinokun.

„Ég vil hlusta á þá sem betur þekkja til lýðheilsu landsmanna en Brynjar Níelsson,“ sagði Kolbeinn.

Hægt er að horfa á umræðuna í heild hér.

Verði nýja áfengisfrumvarpið að lögum verður sala áfengis gefin frjáls hér á landi. Samskonar frumvörp hafa verið lögð fram á tveimur síðustu þingum en ekki farið í atkvæðagreiðslu.

Í Fréttablaðinu í gær kom fram að flutningsmenn nýja frumvarpsins telja líklegra nú en áður að frumvarpið nái í gegn.