Ólafía Þórunn: Hugsa aðeins um eitt högg í einu

„Tilfinningin er mjög góð, ég var mjög afslöppuð og það var ótrúlega gaman að leika þennan hring,“ sagði Ólafía Þórunn Kristinsdóttir, kylfingur úr GR, eftir frábæran hring á öðrum degi Pure Silk Bahama Classic-mótinu á Bahamaeyjum en mótið er hluti af LPGA mótaröðinni.

Hún ræddi við Pál Ketilsson á kylfingur.is en viðtalið má sjá í heild sinni í spilaranum hér fyrir ofan.

Ólafía fylgdi eftir góðum fyrsta hring með enn betri öðrum hring en hún er á sjö höggum undir pari eftir tvo hringi í frumraun sinni meðal þeirra bestu.

„Eins og staðan er núna er ég búinn að gera allt vel. Þetta er fyrsti hringurinn á móti sem ég spila þar sem ég tapa ekki höggi en ég gerði mér ekki grein fyrir því fyrr en eftir á.“

Ólafía komst í gegn um niðurskurðinn strax í fyrstu tilraun en hún sagði það hafa verið markmiðið.

„Ég hafði alveg trú á því að ég gæti komist í gegn en ég reyndi að hugsa ekki mikið um það. Ég reyndi að slá bara eitt högg í einu og gera mitt besta og sjá hvert það myndi skila mér.“

Ólafía sagðist ekki geta kvartað undan aðstæðum á Bahamaeyjum þar sem sólin skín.

„Það eru bara ótrúlega góðar aðstæður, smá vindur en það er ekki hægt að kvarta,“ sagði Ólafía kát.

Golfstöðin hefur sýnt frá fyrstu tveimur keppnisdögunum en þar sem útsendingartími mótsins skarast við útsendingartíma Farmers Insurance mótið á PGA-mótaröðinni verður sýnt frá Pure Silk-mótinu á Stöð 2 Sport 4. Útsendingin, sem hefst klukkan 20.00, verður aðgengileg fyrir áskrifendur Golfstöðvarinnar.

Þá verður vitaskuld bein textalýsing frá gangi mála á íþróttavef Vísis.