Auddi geymir fyrrverandi kærusturnar í kassa

„Þetta er kassi sem fannst uppí skáp hjá mömmu ásamt gömlu dóti frá unglingsárum,“ segir sjónvarpsmaðurinn Auðunn Blöndal í samtali við Vísi en hann sagði frá mjög skemmtilegri sögu í þættinum Satt eða Logið á Stöð 2 í gær.

Auddi tók upp kassa í gær og sagði; „Í þessum kassa geymi ég það sem tengist hverri kærustu sem ég hef átt.“ Í kassanum voru gömul ástarbréf, myndir og dagsetningar sem höfðu sérstaka þýðingu fyrir Auðunn.

„Þó að þetta sé eldgamall kassi, þá afsakar það ekki innihaldið. Maður var eitthvað tæpur á sínum tíma.“

Auddi var með Ágústu Evu Erlendsdóttur og Steinda Jr. í liði. Í hinu liðinu voru þau Vilhelm Anton Jónsson, Katla Margrét Þorgeirsdóttir og Vala Kristín Eiríksdóttir og áttu þau að giska á það hvort kassinn væri raunverulegur og sagan á bakvið hann sönn eða lygi.

Í ljós kom að kassinn er til í raun og veru og hélt Auðunn utan um þessi gögn í mörg ár. Ekkert hefur farið inn í þennan kassa síðan 1995 og því voru ekki alveg allar kærustur hans þarna ofan í.

Hér að neðan má sjá brotið úr þættinum.