Hagnaður Vodafone minnkaði um 22%

Hagnaður Vodafone nam 1.007 milljónum króna á árinu 2016 og dróst saman um 22 prósent frá fyrra ári. Þá lækkuðu heildartekjur fjarskiptafyrirtækisins um eitt prósent á milli ára og voru samtals 13.655 milljónir. EBITDA-hagnaður félagsins – afkoma fyrir fjármagnsliði, afskriftir og skatta – nam 3.060 milljónum á síðasta ári og dróst saman um sex prósent.

Þetta kom fram í afkomutilkynningu sem Vodafone sendi frá sér í gær en þar segir að EBITDA-af­komuspá félagsins fyrir árið 2017 sé hækkuð á ný og er áætluð um 3.250 milljónir.

Í tilkynningu er haft eftir Stefáni Sigurðssyni, forstjóra Vodafone, að árið 2016 hafi að mörgu leyti verið „sérstakt ár í rekstri Fjarskipta hf. þar sem margt fór saman; miklar launahækkanir í tengslum við kjarasamninga, einskiptiskostnaður vegna húsnæðismála, hagræðingaraðgerða og vinnu sérfræðinga við áreiðanleikakönnun vegna hugsanlegra kaupa á 365 miðlum hf.

Á sama tíma höfðu markaðsaðstæður neikvæð áhrif á meðaltekjur af viðskiptavinum. Mótvægisaðgerðir gengu vel þar sem vöxtur í fjölda viðskiptavina hefur ekki verið meiri í seinni tíð eða 7%. Sjónvarpsvörur félagsins skiluðu mikilli aukningu í tekjum sem unnu á móti fyrrgreindum neikvæðum þáttum þrátt fyrir lækkun tekna í heildsöludreifingu sjónvarps. Horfur í rekstri félagsins fyrir árið 2017 eru betri, þar sem ætla má að hagræðingaraðgerðir árið 2016 og vöxtur viðskiptavina skili sér í betri rekstri árið 2017.“

Stefán segir að enn sé unnið að gerð kaupsamnings vegna fyrirhugaðra kaupa á ljósvaka- og fjarskiptahluta 365 miðla og eru bundnar vonir við að sú vinna klárist fyrir lok fyrsta ársfjórðungs.

Fréttin birtist fyrst í Fréttablaðinu