Flóðbylgjan á Grænlandi: Þrír fullorðnir og barn talin af

Fjórir einstaklingar eru nú taldir af eftir að flóðbylgja skall á vesturströnd Grænlands, en þeirra hafði verið saknað síðan á laugardagskvöld.

Frá þessu greindi lögregla á Grænlandi í yfirlýsingu í kvöld.

Að sögn lögreglu er um að ræða þrjá fullorðna og eitt barn og er talið að þau hafi skolað á haf út og drukknað. Búið sé að upplýsa aðstandendur, en leit á svæðinu verður fram haldið þegar aðstæður leyfa.

Flóðbylgjan skall á bæinn Nuugaatsiaq en hún myndaðist eftir berghlaup sem varð í kjölfar jarðskjálfta.

Ellefu hús skolaði þar á haf út og var öllum þorpsbúum gert að yfirgefa heimili sín.