Aprílspá Siggu Kling – Hrúturinn: Mikilvægt að nota húmorinn og gera grín að sjálfum sér

Elsku Hrúturinn minn, það er réttlætisgyðjan sem er að lýsa þér og heimtar réttlæti og þá er það spurning: Hvað finnst þér vera réttlæti? Þetta segir líka við þig að það er enginn að fylgjast með því hvernig gengur hjá þér. Þú átt oft til að hafa of miklar áhyggjur af vitleysunni í öðrum, tilfinning augnabliksins getur stjórnað þér svo mikið og þá áttu á hættu að koma þér á kaldan klaka.

Þú skalt ekki skrifa eða segja neinum neitt sem þú vilt ekki að aðrir frétti, þú þarft að sýna varúð í þessum merkilega mánuði sem þú ert að fara inn í og þessi mánuður á eftir að breyta svörtu í hvítt. Það að á allt eftir að gerast svo hratt í þessari bíómynd þinni sem kallast líf þitt og þér finnst þú ekki alltaf vera leikstjórinn.

Það er mikilvægt að nota húmorinn og gera grín að sjálfum sér og öðrum í kringum þig; Winston Churchill lét þau orð falla að það að segja brandara væri háalvarlegt mál og til þess að þú fáir það sem þú vilt þarft þú að sýna skerpu í orði og standa með þér, álit annarra á því sem þú gerir mun ekki skipta neinu máli.

Það leikur enginn vafi á því að þú munir ná árangri í lífinu þó að stundum finnist þér þú vera að detta. Þú átt það til að hafa þannig áhrif á fólk að því finnist þú vera hrokafullur, en það er sko alls ekki meiningin. Þú munt verða mjög heppinn í öllum orðræðum sem þú munt eiga í á komandi vikum, það er heppni sem stýrir næstu vikum hjá þér.

Mottó – Lífið er dásamlegt og ég er heppinn

Frægir Hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir pírati, Anna Svava Knútsdóttir leikkona, Ólöf Erla, grafískur hönnunarsnillingur, Elton John söngvari, Salka Sól súperdrottning, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, söngkona AmabAdamA, Þórhallur Þórhallsson uppistandari, Kristín Þorsteinsdóttir, aðalritstjóri 365 miðla, Alda í Handy pandy, naglalistakona,  Vala Grand, Hjálmar Forni listamaður, Jakob Bjarnar Grétarsson, Elín Björnsdóttir, fyrirlesari og kraftaverkakona.