Aprílspá Siggu Kling – Ljónið: Ferð inn á tímabil sem gefur þér sannfæringartón og orku

Elsku Ljónið mitt, þú ert svo mikið þessa dagana að leita að lausnum og það er svo algengt að við sjáum oft ekki alveg hvað er fyrir framan nefið á okkur. Þetta tímabil sem er að heilsa þér verður ekki svona erfitt eins og þú heldur, það er hægt að líkja þessu við að fara upp Esjuna; þegar þú stendur fyrir neðan fjallið virðist það eitthvað svo ógnandi, en ekki þegar upp er komið, svo byrjaðu bara á verkinu, þá bjargast dagurinn.

Eins og þú ert einlægur, þá er inni í orkunni þinni svolítið vantraust á fólkinu í kringum þig og þú getur látið það fara of mikið í taugarnar á þér – eins og þú hafir stækkunargler á kuskinu í kringum þig og þá virðist það vera svo ofboðslega stórt. Þú þarft að temja þér svolítið: Þetta verður ekkert mál! Og þar sem orð eru álög, þá mun það hreinsa þetta litla kusk í kringum þig sem þér finnst vera hindrun.

Um leið og apríl verður hálfnaður þá ferðu inn á tímabil sem gefur þér sannfæringartón og orku, til þess að fá þínu framgengt, það er svo mikilvægt að þú sýnir lipurð í öllu og auðmýkt. Vorið er að heilsa þér svo ofsalega öflugt og þú ert með einhver verkefni í höndunum eða ert að fara að kljást við þau sem gefa þér sigur í útkomu.

Þú munt einfalda verkefni þín og vita miklu betur hvert þú ætlar að fara og þú ert að leysa margar krossgátur og þú verður líka hissa á því hversu auðvelt þetta verður. Fólk hreinlega elskar þig og dáir og vill þér meira en það allra besta, því að þú hefur leiðtogann svo sterklega með þér og maður getur þekkt þig úr fjöldanum.

Fyrir ykkur, elskurnar, sem eruð á lausu er ástin allt í kringum ykkur, ótrúlegasta fólk er að daðra við þig, en það er eins og þú nennir ekki að veita því neina athygli. Þú getur náð í þann sem þú vilt, en þú verður að nenna því.

Mottó – Ljónið er kóngurinn!