Aprílspá Siggu Kling – Fiskarnir: Þú ert á miklu orkusvæði og margt að gerast í kringum þig

Elsku Fiskurinn minn, þú ert eins spennandi manneskja og land sem hefur verið ókannað, það veit enginn alveg hver þú ert svo þú kemur alltaf á óvart og átt það ekki til að vera leiðigjarn, það er svo einfalt. Í stöðunni í lífinu er allt gott, þú ert á miklu orkusvæði og margt að gerast í kringum þig.

Þú hefur það í hendi þér að vera sigurvegari í leiknum sem er fram undan, þó þú sért alveg SNILLINGUR í að finna eitthvað til að drepa þig úr áhyggjum. Það er mikið að gerast í kringum fjölskylduna og vinina, sem veldur bæði sársauka en gefur líka gleði.

Þú ert að fara inn í tímabil þar sem þú færð lausn og sérð betur að svarið við áhyggjunum er að hætta að velta öllu svona mikið fyrir sér, að hætta að vera bjargvættur alls, að kjarna sig inn í friðinn og ná í núllpunktinn. Dásamlegur fiskur sem ég þekki fékk allt upp í hendurnar sem hún vildi vegna þess að hún trúði því að hún skapaði sér framtíðina.

Það eina sem henni gekk erfiðlega var að eignast peninga, hún tengdi alltaf peninga við skuldir svo þeir hurfu jafnharðan í þær, að sjálfsögðu. Fyrir um það bil ári varð hún afskaplega pirruð við tilveruna út af þessu, og hún sagði djöfulsins rugl í henni Siggu vinkonu, að maður fái allt sem maður óskar sér ef maður trúir.

Hún bjó á erfiðu svæði þar sem uxu engin tré; á Vatnsleysunni. Hún sagði hátt og skýrt að hún gæti alveg eins óskað sér að hún fengi risastór tré í kringum sig á Vatnsleysuna. Daginn eftir var hringt í hana og hún spurð hvort hana vantaði ekki tré, því það var verið að taka upp tré í Reykjavík.

Hún bjóst við að þetta væru einhverjar ræfilslegar hríslur, en daginn eftir kom flutningabíll með stór tré og innan nokkurra daga var búið að setja þau upp allt í kringum hana. Hún tengdi ekki áhyggjur við tré, en tengdi áhyggjur við peninga. Og þú, elsku andlegi fiskurinn minn, skalt skoða þessa sögu því hún er send til þín. Þú ert á blessuðum krossgötum í lífi þínu og það er sama hvaða veg þú velur, það eru engin mistök fólgin í því, heldur bara sú leið sem þú ákveður að hamingjunni.

Mottó – Það er allt að bjóðast þér, þú færð meira en augað sér

Frægir Fiskar: Elísabet Ásberg listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna, Katla Sign og Baby Kling, Lína Rut listaperla.