„Mikil ábyrgð á mínum herðum“

Tómas Þór Þórðarson er umsjónarmaður nýs handboltaþáttar á Stöð 2 Sport en sýnt verður frá Olís-deildum karla og kvenna á stöðinni í vetur. Hann segist vera mjög spenntur fyrir því að handboltinn sé kominn yfir á Stöð 2 Sport.

„Ég er alveg ótrúlega spenntur og auðvitað þakklátur fyrir þetta tækifæri. Það er mikil ábyrgð á mínum herðum og Garðars Arnar Arnarsonar, framleiðanda, að taka við þessu stóra sporti og koma því aftur á þann stall sem það á heima,“ segir Tómas Þór.

„Við höfum ekki fengið mikinn tíma til að undirbúa okkur en búum að góðri reynslu eftir að búa til Körfuboltakvöld þannig að við þorum að lofa góðum þætti.“

Hann segir að fyrst og fremst verði stöðug umfjöllun með beinum útsendingum karla og kvenna í hverri viku og uppgjörsþáttur þar sem farið verður yfir alla leiki hjá körlunum og sjónvarpsleikinn hjá konunum.

„Þetta hefur ekki verið til í mörg, mörg ár. Maður finnur fyrir spennunni í handboltasamfélaginu og tilhlökkunin er mikil að fara af stað með þetta.“

Tómas segir að þeir félagarnir ætli sér ekki endilega að finna upp hjólið þegar kemur að svona uppgjörsþætti.

„Þetta er í grunninn bara að fara yfir það sem gerist í leikjunum en svo þarf hver þáttur að finna sinn takt. Við Garðar vissum alveg hvert við ætluðum með körfuboltann og fundum fullkominn mann til að stýra honum í Kjartani Atla Kjartanssyni. Við erum líka með nokkuð skýra hugmynd um taktinn í handboltanum og vonum bara að fólki líki vel við.“