Barnaverndarstofa rannsakar sérstaklega mál afans sem braut gegn barnabörnum

Viðbrögð viðkomandi barnaverndaryfirvalda í máli nær áttræðs karlmanns, sem sakfelldur var fyrir kynferðisbrot gegn þremur barnabörnum sínum í síðustu viku, hafa verið harðlega gagnrýnd. Barnaverndarstofa hyggst nú rannsaka sérstaklega meðferð málsins og viðbrögð starfandi barnageðlæknis á svæðinu.

Í dómi Héraðsdóms Norðurlands eystra, sem féll yfir manninum þann 11. júlí síðastliðinn, kemur fram að brotin áttu sér stað um margra ára skeið, eða frá árinu 1997 til ársins 2008. Í fréttatilkynningu, sem send var til fjölmiðla í dag, áréttar Barnaverndarstofa að miklar breytingar hafi orðið í málaflokknum á síðustu árum.

„Ástæða er að halda því til haga að margt hefur breyst til batnaðar í barnaverndarmálum á Íslandi frá þeim tíma sem þessi hörmulegu brot gegn börnunum áttu sér stað,“ segir í tilkynningunni.

Nýta eftirlitsheimildir til að kanna ákveðna þætti málsins

Þá segir enn fremur í tilkynningunni að í fjölmiðlum hafi komið fram „ávirðingar um mistök viðkomandi barnaverndarnefndar.“ Sérstaklega er upptalin gagnrýni varðandi það að mál viðkomandi barns hafi verið látið niður falla við flutning fjölskyldunnar úr sveitarfélaginu og enn fremur að málinu hafi ekki verið komið í réttan farveg innan barnaverndarkerfisins. Barnaverndarstofa mun nú nýta eftirlitsheimildir stofunnar til að kanna þessa þætti málsins sérstaklega.

„Varhugavert er að draga of víðtækar ályktanir í þessum efnum án frekari athugunar. Af þessum sökum og í ljósi alvarleika og eðlis umrædds máls telur Barnaverndarstofa rétt og skylt að upplýsa um að tekin hefur verið sú ákvörðun  að nýta eftirlitsheimildir stofunnar til þess að kanna framangreinda þætti málsins sérstaklega,“ segir í tilkynningunni.

„Mun þá koma til skoðunar hver viðbrögð nefndarinnar og starfsmanna hennar voru við tilkynningu um málefni barnsins og hvaða farveg málinu var komið í. Þá verður einnig sérstaklega skoðað hvað varð til þess  að máli barnsins var lokað hjá nefndinni og hvort um hafi verið að ræða athafnaleysi eða jafnvel vanrækslu að hálfu nefndarinnar.“

Viðbrögð barnageðlæknisins rannsökuð sérstaklega

Þá mun Barnaverndarstofa einnig kanna sérstaklega viðbrögð starfandi barnageðlæknis á svæðinu, sem bjó yfir nákvæmum upplýsingum um langvarandi kynferðisofbeldi gegn einum af brotaþolum málsins.

„Í umræddum dómi kemur fram að starfandi barnageðlæknir á svæðinu hafi haft rökstuddan grun um alvarleg brot gegn einum af brotaþolum málsins. Í málinu lá fyrir læknabréf, sem er eitt af sönnunargögnum málsins, þar sem fram kemur að hann hafi búið yfir nákvæmum upplýsingum um langvarandi kynferðisofbeldi gegn barninu. Af lestri dómsins verður ekki séð að viðkomandi barnageðlæknir hafi komið þeim upplýsingum til barnaverndaryfirvalda svo sem skylt er að lögum. Barnaverndarstofa mun beina þeim tilmælum til Embætti Landlæknis að hann láti kanna þann þátt málsins sérstaklega.“

Karlmaðurinn var dæmdur í fjögurra ára fangelsi fyrir kynferðisbrot gegn þremur barnabörnum sínum þann 11. júlí síðastliðinn. Stúlkurnar voru á aldrinum 6-14 ára þegar brotin áttu sér stað en manninum var gert að greiða tveimur þeirra miskabætur, samtals 3,6 milljónir króna.