Spennandi að leika í kvikmynd

Hinn 13 ára Elías Óli Hilmarsson leikur á móti Sigurði Skúlasyni í stuttmyndinni Fótspor sem fjallar um samband barnabarns við afa sinn og keppir um verðlaun á barnamyndahátíðinni Generator +10 sem er ein sú stærsta sinnar tegundar.

Hvað kom til að hann tók þátt í þeirri mynd? Það var haft samband við mig og ég var beðinn um að koma í prufu. Það gekk vel og ég var beðinn um að leika hlutverkið.

Hvað var skemmtilegast við það? Bara að kynnast þessu öllu og auðvitað fannst mér gaman að leika.

En hvað leiðinlegast? Þetta var allt svo nýtt og spennandi svo það var bara mjög gaman.

Heldurðu að þú farir á Generator-kvikmyndahátíðina? Nei, það held ég ekki, mér finnst það ólíklegt. En það væri gaman.

Hefur þú oft leikið áður? Ég hef leikið í útvarpsleikriti og talað inn á teiknimyndir.

Hvað gerir þú helst í tómstundum? Ég æfi handbolta, fer á skíði og fer í veiði.

Ertu veiðikló? Já, mér finnst mjög gaman að veiða.

Áttu þér uppáhaldsveiðistað? Ég veiddi einu sinni mjög vel í Laxá í Dölum og ég er nýkominn af Arnarvatnsheiði, það var gaman.

Hefur þú ferðast mikið um Ísland? Já, við fjölskyldan ferðumst mikið.

Hver er fallegasti staður á landinu sem þú hefur komið á? Það var mjög fallegt að ganga Laugaveginn niður í Þórsmörk.