Fyrstu leikir tímabilsins verða Evrópuleikir hjá Val, FH og Aftureldingu

Þrjú íslensk lið, sem taka þátt í Evrópukeppninni í vetur, þurfa að spila sína fyrstu Evrópuleiki áður en Íslandsmótið hefst.

Valur, FH og Afturelding verða því búin að spila tvo Evrópuleiki þegar kemur að fyrstu umferð Olís-deildar karla.

Öll þrjú liðin taka þátt í EHF-bikarnum og eru leikirnir í fyrstu umferð forkeppninnar.

Afturelding mætir norska félaginu Bækkelaget. Fyrri leikurinn er á heimavelli Mosfelling á Varmá 2. september en sá síðari viku síðar í Osló í Noregi.

Íslands- og bikarmeistarar Valsmanna lentu á móti ítalska félaginu SSV Bozen Loacker Volksbank en báðir leikirnir verða spilaðir hér á landi. Leikirnir við Bozen fara fram 9. og 10. september í Valshöllinni.

FH-liðið mætir síðan tékkneska félaginu HC Dukla Prag. Fyrri leikurinn er í Tékklandi 3. september en síðari í Kaplakrika 9. september.

Þetta er í annað skiptið sem FH spilar við tékkneska félagið Dukla Prag í Evrópukeppni en bæði Þróttur og Víkingur léku einnig gegn  liðinu á sínum tíma eða þegar það var eitt sterkasta handboltafélag Evrópu.

Petr Baumruk lék auðvitað með Dukla Prag í Tékklandi á sínum ferli og á sjötta áratugnum spiluðu þar bestu handboltamenn heims eða þeir Rudolf Havlík,  Václav Duda og Vojtech Marez. Rudolf Havlík var síðar þjálfari Víkings og HK hér á Íslandi.